Служба бяспекі Украіны абвінаваціла ў ваенных злачынствах кіраўніка Чачэніі Рамзана Кадырава і ягоных паплечнікаў.
СБУ піша, што Рамзан Кадыраў у лютым – сакавіку 2022 года асабіста кіраваў распрацоўваннем і планаваннем асобных вайсковых дзеянняў ва Украіне, аддаваў загады, заслухоўваў зводкі і справаздачы. Яму выставілі абвінавачанне паводле трох артыкулаў Крымінальнага кодэксу Украіны: «Планаванне і развязванне агрэсіўнай вайны»; «Здзяйсненне наўмысных дзеянняў з мэтаю змяніць межы Украіны, якія прывялі да гібелі людзей»; «Апраўданне ўзброенай агрэсіі Расеі».
Таксама вінавацяць Данііла Мартынава, намесніка начальніка ўпраўлення Нацыянальнай гвардыі Расеі ў Чачэніі, і Хусэйна Межыдава, камандзіра 249-й тактычнай групы асобнага матарызаванага батальёну «Поўдзень» Нацыянальнай гвардыі Расеі.
Паводле СБУ, Мартынаў 5 сакавіка асабіста кіраваў захопам Барадзянскага псіханеўралагічнага інтэрнату. Ён таксама загадваў узяць у закладнікі амаль 500 пацыентаў, мініраваць падыходы да будынку, а сам інтэрнат пераўтварыць у агнявую пазіцыю.
Хусэйна Межыдава вінавацяць у захопе ў закладнікі і ўтрыманні ў склепах шматпавярховікаў з 25 лютага да 13 сакавіка амаль 200 жыхароў Гастомелю, у тым ліку жанчын, старых і дзяцей. Сярод пацярпелых, сцвярджае СБУ, былі жанчыны, асобы сталага веку і дзеці. Палонных, якія не вытрывалі бесчалавечных умоваў утрымання, пахавалі.
Кадыраў у аўдыяпаведамленні ў Telegram-канале заявіў, што прымае абвінавачанні СБУ:
«Вызначыце месца, куды нам з’явіцца, мы з задавальненнем прыедзем і разбярэмся, хто злачынец, хто забойца, хто тэрарыст. У вас ні гонару, ні сумлення».
Кіраўнік Чачэніі паведаміў, што працягне браць удзел у расейскай агрэсіі. А Кіева яму нібыта не дае захапіць Уладзімір Пуцін.
Якуб Хруст belsat.eu