26 красавіка адбылася тэлефонная размова кіраўніка КНР Сі Цзінь Піна і прэзідэнта Украіны Уладзіміра Зяленскага. Гэта была першая размова паміж лідарамі дзвюх дзяржаваў пасля пачатку поўнамаштабнага расейскага ўварвання ва Украіну. Як паведаміла памочніца міністра замежных справаў КНР, ініцыятыва тэлефанавання зыходзіла з Кіева.
Уладзімір Зяленскі напісаў у сваім Twitter аб тым, што размова была «доўгай і змястоўнай», а таксама выразіў упэўненасць, што разам з прызначэннем пасла Украіны ў Кітаі гэта «дасць моцны штуршок развіццю двухбаковых адносінаў». Размова вялася цягам гадзіны і, як адзначыў кіраўнік Офісу ўкраінскага прэзідэнта, мела характар «важнага дыялогу».
Як стала вядома сёння, прэзідэнт Украіны 26 красавіка падпісаў загад аб прызначэнні паслом Украіны ў Кітаі экс-міністра ў справе стратэгічных галінаў прамысловасці Паўла Рабікіна.
Кітайскі бок заявіў пра тое, што незалежна ад міжнароднай сітуацыі гатовы супрацоўнічаць з Кіевам і збіраецца накіраваць свайго прадстаўніка з візітам ва Украіну і іншыя краіны для таго, каб «падрабязна абмеркаваць з усімі зацікаўленымі бакамі палітычнае ўрэгуляванне ўкраінскага крызісу». Згодна з паведамленнем Кітайскага цэнтральнага тэлебачання, «Кітай будзе рашуча спрыяць перамоўнаму працэсу і спыненню агню ў як мага больш кароткія тэрміны».
Пры гэтым Сі Цзінь Пін падкрэсліў, што «ў ядравай вайне не можа быць пераможцаў» і што «трэба па-сапраўднаму паглядзець на праблему, зыходзячы з уласнай будучыні, а таксама будучыні ўсяго чалавецтва».
Апроч гэтага, Сі Цзінь Пін адзначыў, што ва «ўкраінскім пытанні Кітай нязменна стаіць на баку міру», і нагадаў пра ўласную прапанову для ўрэгулявання «ўкраінскага крызісу».
«Кітай, – падкрэсліў ён, – сталы чалец Рады бяспекі ААН і адказная дзяржава. Мы не будзем спакойна назіраць збоку за пажарам, які адбываецца, і не будзем падліваць алею ў агонь». Таксама ён дадаў, што Пекін «не мае намеру атрымліваць для сябе якую-небудзь выгаду» з украінскага канфлікту.
Нагадаем, што размовы Сі Цзінь Піна і Уладзіміра Зяленскага ўсе чакалі яшчэ з моманту візіту кіраўніка КНР у Маскву 20–23 сакавіка 2023 года. Але яна тады так і не адбылася.
У лютым Пекін прапанаваў мірны план палітычнага ўрэгулявання паміж Украінай і Расеяй, які складаўся з 12 пунктаў.
Раман Шавель belsat.eu