Дырэктарцы Гомельскага моладзевага тэатру Алене Маставенцы ўручылі паведамленне пра непрацяг кантракту, які сканчаецца 25 студзеня. Прычынаў звальнення пакуль не называлі.
«Беларускія ўлады працягваюць зачышчаць тэатр ад яскравых, неардынарных, таленавітых дзеячаў. На гэты раз дабраліся да Гомельскага маладзёжнага тэатру. Два дні таму дырэктару Алене Маставенцы ўручылі апавяшчэнне пра непрацяг кантракту», – напісала ў Facebook тэатральны крытык Настасся Панкратава.
Паводле Панкратавай, акторы тэатру пішуць лісты ў абарону сваёй кіраўніцы, але шанцаў змяніць сітуацыю мала. «Бэкграўнд двух апошніх гадоў пакідае вельмі мала надзеі на хоць нейкую справядлівасць. Каму патрэбная творчасць, калі ў аснову кладзецца ідэалогія?», – кажа яна.
Як кажа тэатральны крытык, мясцовыя газеты называлі «Маладзёжку» самым лямпавым тэатрам у горадзе, але цяпер атмасферны тэатр імкліва адкаціўся да безаблічнага калектыву, якіх сёння стае ў Беларусі.
За час кіравання Алены Маставенкі Гомельскім моладзевым тэатрам – з 2017 года – там з’явілася шмат небанальных аўтараў і яскравых рэжысёраў. На яго сцэне працавалі такія рэжысёры, як Юрый Дзівакоў, Дзяніс Паршын, Віталь Краўчанка. Для спектакляў браліся п’есы сучасных беларускіх і замежных драматургаў.
Алена Рувіна belsat.eu