Лідары краінаў Еўрапейскага Звязу падчас сустрэчы ў Бруселі 20–21 кастрычніка выступілі з асуджэннем Ірану і Беларусі, якія сталі саюзнікамі Расеі ў вайне, якую яна развязала на тэрыторыі Украіны. Краіны ЕЗ узгаднілі рэзалюцыю, тэкст якой быў размешчаны на сайце Еўрапейскай рады.
«Еўрапейская рада заклікае ўлады Беларусі спыніць падтрыманне расейскай агрэсіўнай вайны шляхам дазволу расейскім узброеным сілам выкарыстоўваць тэрыторыю Беларусі і праз падтрыманне расейскіх вайскоўцаў. Рэжым у Беларусі павінен у поўнай меры выконваць уласныя абавязкі ў адпаведнасці з міжнародным заканадаўствам», – гаворыцца ў рэзалюцыі.
У рэзалюцыі сказана і аб тым, што Еўрапейскі Звяз застаецца гатовы хутка ўводзіць новыя санкцыі супраць Беларусі.
Таксама ў тэксце рэзалюцыі асуджаюцца дзеянні Ірану, які пастаўляе Расеі зброю.
«Еўрапейская рада таксама рашуча асуджае вайсковае падтрыманне агрэсіўнай расейскай вайны, якое аказваюць іранскія ўлады, і яно павінна быць спыненае. У сувязі з гэтым Еўрапейская рада вітае санкцыі ЕЗ, прынятыя 20 кастрычніка», – заявілі лідары краін Еўрапейскага Звязу.
Еўрапейская рада таксама пацвердзіла сваю далейшую падтрымку Украіны, якая будзе працягвацца столькі, колькі спатрэбіцца, уключаючы палітычныя, вайсковыя і фінансавыя захады. Лідары краінаў ЕЗ таксама заклікалі да больш хуткага вылучэння Украіне яшчэ 3 млрд еўраў фінансавай дапамогі.
Раней, 10 кастрычніка, пасля абвінавачанняў уладаў Беларусі на адрас Украіны Еўракамісія ўзняла пытанне новых санкцыяў супраць Беларусі. Прадстаўнік ЕЗ у замежных справах Пэтэр Стана заклікаў спыніць распаўсюд «ілжывых абвінавачанняў» на адрас Украіны і адклікаць супольную групоўку войскаў з Расеяй.
Алена Рувіна belsat.eu