NATO павінна сур’ёзна падрыхтавацца да магчымага будучага расейскага кантролю над Беларуссю. Пра гэта паведамляе амерыканскі Інстытут вывучэння вайны (ISW) з нагоды імаверных планаў Крамля адносна паглынання Беларусі.
«Пуцін, хутчэй за ўсё, дабʼецца значных поспехаў у аднаўленні сюзерэнітэту Расеі над Беларуссю, незалежна ад выніку ягонага ўварвання ва Украіну», – гаворыцца ў аналізе ISW.
На думку аналітыкаў, «калі Захад дазволіць Пуціну захаваць свае цяперашнія дасягненні ва Украіне, асабліва ў Крыме і ўсходняй частцы Херсонскай вобласці, тады Крэмль зможа выкарыстоўваць як акупаваныя беларускія, так і ўкраінскія тэрыторыі, каб яшчэ больш пагражаць Украіне і ўсходняму флангу NATO».
ISW прапануе Захаду зрабіць Украіну «надзейным вайсковым партнёрам у абароне ўсходняга флангу NATO ад Расеі і акупаванай Расеяй Беларусі». Пры гэтым выказваецца сумнеў, што «Захад зможа перамагчы або эфектыўна адрэагаваць на расейскую кампанію паглынання Беларусі без папярэдняй паразы расейскага ўварвання ва Украіну».
Напярэдадні ў рукі журналістаў трапіў дакумент з адміністрацыі прэзідэнта РФ пад назвай «Стратэгічныя мэты Расейскай Федэрацыі на беларускім кірунку», згодна з якім Масква плануе ўзяць Беларусь пад поўны кантроль да 2030 года.
Паводле дакументу, Крэмль мае намер падпарадкаваць сабе палітычнае, эканамічнае і культурніцкае жыццё Беларусі, прывесці беларускае заканадаўства ў адпаведнасць з расейскім, значна павысіць узровень вайсковай супрацы, забяспечыць дамінаванне расейскай мовы над беларускай. План разбіты на тры этапы: да 2022, 2025 і 2030 года.
Дакумент быў падрыхтаваны ўлетку 2021 года Упраўленнем прэзідэнта РФ у пытаннях памежнай супрацы, якое курыруе намеснік кіраўніка адміністрацыі прэзідэнта Дзмітрый Козак, а непасрэдна ўзначальвае Аляксей Філатаў. Раней Філатаў прадстаўляў інтарэсы Крамля ў Паўднёвай Асеціі і Абхазіі, займаўся палітычным і гуманітарным узаемадзеяннем з «ЛДНР».
Якуб Хруст belsat.eu
