У Менскім гарадскім судзе пачаўся разгляд справы Арцёма Лябедзькі. Яго абвінавачваюць у «фінансаванні дзейнасці экстрэмісцкага фармавання». Відэа з судовай залі апублікавала агенцтва «Sputnik Беларусь».
Арцёму Лябедзьку пагражае ад трох да пяці гадоў калоніі. Працэс вядзе суддзя Яўген Пісарэвіч.
Сына палітыка Анатоля Лябедзькі затрымалі ў сакавіку. Двойчы мужчыну прызначылі 15 содняў арышту, а пасля выставілі абвінавачванне паводле крымінальнага артыкулу.
Праваабаронцы прызналі спадара Арцёма палітвязнем.
Анатоль Лябедзька раней казаў, што справа супраць ягонага сына – «вышэйшы пілатаж бесчалавечнасці і мярзотнасці»:
«Свядома, мэтанакіравана ідуць па жывых людзях, па сям’і, па дзіцяці. Пад падэшвай беззаконня хлюпаюць слёзы, хрусцяць косці, краваточыць боль».
Спадар Анатоль упэўнены: пераслед учынены толькі таму, што Арцём – ягоны сын. «Самае мярзотнае, калі пачынаюць распраўляцца з роднымі, бяруць у закладнікі тваіх блізкіх», – адзначаў палітык.
Таксама сёння, як піша БелТА, у тым жа Менскім гарадскім судзе пачаўся разгляд справы аб нападзе на беларускую амбасаду ў Лондане. Працэс адбываецца ў межах гэтак званага спецыяльнага вядзення. Чацвярых фігурантаў будуць судзіць завочна, бо Вялікая Брытанія адмовілася іх выдаваць.
Інцыдэнт ля пасольства адбыўся ў снежні пазалетась. Паводле версіі ўладаў Беларусі, некалькі асобаў закідалі будынак яйкамі, а затым напалі на дыпламатаў, якія прыбылі на месца.
У Беларусі арыштавалі маёмасць фігурантаў справы на 73,5 тысячы рублёў.
Фота вокладкі: BELTA / Telegram
Сяргей Крот belsat.eu
