На палігоне ўнутраных войскаў МУС РБ каля вёскі Аколіца (Менскі раён) 19 кастрычніка знік салдат тэрміновай службы. Пра гэта паведамляў Telegram-канал «МотолькоПомоги». Але ў МУС аператыўна зняпраўдзілі гэтую інфармацыю. Вось толькі насамрэч, як высветліў блогер, інцыдэнт меў месца, сілавікі ўводзілі на ўсёй Менскай вобласці план «Сірэна» па пошуку зніклага вайскоўца.
Салдат тэрміновай службы Мікіта Юр’евіч В. вайсковай часткі 3214 Унутраных войскаў МУС РБ 19 кастрычніка сапраўды пакінуў размяшчэнне палігона. Але зрабіў ён гэта не спецыяльна, так сталася, што вайсковец, у якога пры сабе была зброя, проста згубіўся.
Падчас выхаду на перакур гэты вайсковец адстаў ад сваіх калегаў. У выніку салдат з аўтаматам пайшоў у кірунку, які абраў не задумваючыся.
На палігоне, калі недалічыліся вайскоўца, агучылі трывогу і на тэрыторыі ўсёй Менскай вобласці ўводзілі план «Сірэна». У выніку праз пару гадзінаў салдата знайшлі.
Адметна, што інфармацыю пра ўцёкі салдата аператыўна абверглі прадстаўнікі УУС Гарадзенскага аблвыканкаму. Яны паведамілі, што «салдат тэрміновай службы в/ч 3214 самавольна не пакідаў размяшчэнне часткі. Не верце фэйкам дэструктыўных інтэрнэт-рэсурсаў!»
Блогер удакладняе, што адрэагавалі на інфармацыю менавіта ў Горадні, хоць палігон знаходзіцца ў Менскай воласці, паколькі вайсковец з’яўляецца жыхаром Ваўкавыскага раёну.
Алена Аляксандрава belsat.eu