Украіна мае намер адклікаць свайго амбасадара ў Беларусі Ігара Кізіма, каб правесці кансультацыі. Такое рашэнне было прынятае пасля сустрэчы Аляксандра Лукашэнкі і кіраўніка непрызнанай Данецкай народнай рэспублікі Дзяніса Пушыліна, паведамляе прэс-служба МЗС Украіны.
Украінскі бок назваў сустрэчу чарговым «абуральным недружалюбным актам» з боку Менску, накіраваным на падтрыманне дзяржавы-агрэсара.
«У сувязі з гэтым МЗС Украіны прыняло рашэнне выклікаць пасла Украіны ў Рэспубліцы Беларусь Ігара Кізіма для кансультацыяў», – сказана ў заяве міністэрства.
Сустрэча Лукашэнкі і Пушыліна прайшла ў Менску 18 красавіка. У сваю чаргу Лукашэнка прапанаваў выканальніку абавязкаў кіраўніка «ДНР» дапамогу ў аднаўленні рэгіёну «ад імя беларускага народу». На ягоную думку, у «ДНР» неабходна адраджаць прамысловыя прадпрыемствы і сельскую гаспадарку.
Алена Рувіна belsat.eu
