Намеснік міністра ўнутраных справаў Беларусі Мікалай Карпянкоў 14 ліпеня ў Гомлі правяраў баявую гатовасць новага атраду спецыяльнага прызначэння «Буран». Чыноўнік заявіў, што новыя падраздзяленні ў сваёй працы будуць выкарыстоўваць «унікальны і багаты досвед НКВД», паведамляе Telegram-канал Гомельскага аблвыканкаму.
Правяранне баявой гатовасці праходзіла на базе вайсковай часткі 5525. Прысутнічалі таксама старшыня Гомельскага аблвыканкаму Іван Крупко, начальнік УУС Алякандр Шастайла, вайсковы камісар вобласці Андрэй Крываносаў і іншыя.
Мікалай Карпянкоў патлумачыў, навошта ствараюцца новыя атрады спецпрызначэння:
«Для ўзмацнення нашых баявых магчымасцяў, найперш дзеля таго, каб яны былі гатовыя і здольныя весці сучасныя баявыя дзеянні, маглі высочваць і знішчаць дыверсійна-разведвальныя групы і незаконныя ўзброеныя фармаванні, якія да нас сюды непасрэдна могуць уварвацца».
Намеснік міністра МУС дадаў, чыім досведам будуць кіравацца атрады.
«Мы імкнемся рэалізаваць той унікальны багаты досвед, які ёсць у падраздзяленнях НКВД, калі яны выяўлялі дыверсантаў, паліцаяў, калабарацыяністаў, якія хаваліся ў нашых лясах. Нашыя падраздзяленні здольныя выканаць задачу і ў цывільнай вопратцы, высочваючы, і ў цяжкім абмундзіраванні, праводзячы армейскія спецаперацыі, – казаў Карпянкоў. – Такія групы, яны называліся чэкісцка-вайсковыя. Гэта вось менавіта ў шчыльным узаемадзеянні з крымінальнай міліцыяй мы падрыхтуем падраздзяленні, якія будуць спалучаць гэты досвед чэкісцка-вайсковых групаў».
Чыноўнік дадаў, што ў атрады ўваходзяць «хлопцы, якія служылі ва ўнутраных войсках» з досведам службы 3–5 гадоў, якія маюць чырвоныя берэты.
Марыя Міхалевіч belsat.eu
