У ноч на 13 снежня расейцы атакавалі Украіну дзесяццю беспілотнікамі тыпу «Shahed» і дзесяццю балістычнымі ракетамі. Як паведамілі ў Паветраных сілах Украіны, усе варожыя цэлі ўдалося збіць.
Амаль усе беспілотнікі, што ляцелі з Крыму, былі збітыя над Адэскай вобласцю.
«Роўна а 3:00 13 снежня 2023 года праціўнік нанёс ракетны ўдар па сталіцы Украіны. Усе дзесяць цэляў, якія ляцелі ў кірунку Кіева паводле балістычнай траекторыі, збітыя зенітным ракетным падраздзяленнем Паветраных сілаў», – заявілі ў Паветраных сілах.
Тым не менш падзенне аскепкаў ракетаў нанесла пашкоджанні ў Кіеве. У выніку пацярпелі 53 асобы, 20 з іх, у тым ліку двое дзяцей шпіталізаваныя, 33 пацярпелым медыкі надалі дапамогу на месцы. У тым ліку і шасцярым дзецям, паведаміў мэр украінскай сталіцы Віталій Клічко.
Паводле мэра, абломкамі ракетаў былі пашкоджаныя фасады шматкватэрных і прыватных дамоў, гарэлі аўтамабілі, быў пашкоджаны водаправод. Таксама былі выбітыя вокны і пашкоджаны ўваход у дзіцячай больніцы. Праводзіліся эвакуацыі.
Злучаныя Штаты Амерыкі падчас візіту прэзідэнта Украіны Уладзіміра Зяленскага заявілі пра вылучэнне новага пакету ўзбраення і тэхнікі для падтрымання Украіны ад агрэсіі Расеі.
Якуб Хруст belsat.eu