У Беларусі хочуць дазволіць заводзіць крымінальныя справы супраць мёртвых, калі справа тычыцца генацыду, ваенных злачынстваў і іншых злачынстваў – усяго паводле дзесяці артыкулаў. Такі праект закону «Аб змене Крымінальна-працэсуальнага кодэксу» Савет міністраў унёс на разгляд Палаты прадстаўнікоў на мінулым тыдні.
Здымак мае ілюстрацыйны характар.
Фота: belta.by
Заводзіць крымінальныя справы ў дачыненні мёртвых можна будзе паводле наступных артыкулаў:
- падрыхтоўка або вядзенне агрэсіўнай вайны (арт. 122 КК);
- акт міжнароднага тэрарызму (арт. 126 КК);
- генацыд (арт. 127 КК);
- злачынствы супраць бяспекі чалавецтва (арт. 128 КК);
- вытворчасць, назапашванне або распаўсюджванне забароненых сродкаў вядзення вайны (арт. 129 КК);
- экацыд (арт. 131 КК);
- прымяненне зброі масавага паражэння (арт. 134 КК);
- парушэнне законаў і звычаяў вайны (арт. 135 КК);
- злачынныя парушэнні нормаў міжнароднага гуманітарнага права падчас узброеных канфліктаў (арт. 136 КК);
- бяздзейнасць або адданне злачыннага загаду падчас узброенага канфлікту (арт. 137 КК).
Абвінавачаным у такіх справах будзе давацца адвакат, у судах іх могуць прадстаўляць сваякі.
Праект паправак у Крымінальна-працэсуальны кодэкс ужо апублікаваны і рыхтуецца да першага чытання ў Палаце прадстаўнікоў.
Алена Рувіна belsat.eu
