10 сакавіка Сі Цзінь Пін аднагалосна быў пераабраны старшынём Кітайскай Народнай Рэспублікі і старшынём Цэнтральнай вайсковай камісіі КНР. Такое рашэнне прыняў Усекітайскі сход народных прадстаўнікоў, перадае «Сінь-Хўа».
Сі Цзінь Пін абраны старшынём КНР ужо трэці раз запар. Дагэтуль ніводзін з кіраўнікоў краіны не займаў гэтай пасады больш за два разы. Упершыню Сі Цзінь Піна абралі старшынём краіны ў 2013 годзе. Тады ж ён заняў і пасаду старшыні Цэнтральнай вайсковай камісіі КНР.
Апроч таго, Сі Цзінь Пін з 2012 года ёсць генеральным сакратаром Камуністычнай партыі Кітаю і старшынём Вайсковай камісіі ЦК КПК.
Як адзначае «Reuters», Сі Цзінь Пін захаваў пазіцыі самага магутнага кіраўніка краіны з часоў Маў Цзэ Дуна. Паводле Ўілі Лэма, эксперта Джэймзтаўнскага фонду, кітайскі лідар мае поўны кантроль над Палітбюро і ЦК, ніякага стрымлівання і процівагі ў кіраўніцтве Кітаю не будзе.
Бі-Бі-Сі называе пераабранне кітайскага лідара беспрэцэдэнтным. Да Сі Цзінь Піна, з часу Дэн Сяў Піна, у Кітаі дзеяла абмежаванне – два тэрміны на пасадзе генеральнага сакратара. Але ў 2018 годзе яно з ініцыятывы цяперашняга лідара краіны было скасаванае.
Падчас пераабрання Сі Цзінь Піна ў 2022 годзе генеральным сакратаром КПК з залы вывелі 79-гадовага былога генеральнага сакратара кампартыі Ху Цзінь Таў. Прычыны гэтага невядомыя. Мяркуючы з відэа, просьба пакінуць залу была для былога кіраўніка Кітаю нечаканасцю, і ён не хацеў сыходзіць. Таму яго вывелі, фактычна ўзяўшы пад рукі. Ху Цзінь Таў узначальваў Кітай з 2003 да 2013 года і перадаў уладу якраз Сі Цзінь Піну, пасля чаго зрабіўся апанентам цяперашняга кіраўніка.
Якуб Хруст belsat.eu
