Ноччу 6 верасня Расея атакавала Адэскую вобласць ударнымі беспілотнікамі, па Кіеве запусціла балістычную ракету. Наступствамі сталі разбурэнні і пажары, у Адэскай вобласці загінуў супрацоўнік сельскагаспадарчага прадпрыемства.
Атака па Адэскай вобласці працягвалася тры гадзіны, паведаміў кіраўнік Адэскай абласной ваеннай адміністрацыі Алег Кіпер.
«На жаль, адзін чалавек загінуў. Супрацоўнік аграпрадпрыемства, які атрымаў цяжкія раненні, памёр у шпіталі. <…>. У некалькіх населеных пунктах зафіксаваныя разбурэнні і пажары. Пашкоджаныя аб’екты прыпартавой і сельскагаспадарчай інфраструктуры: элеватары, адміністратыўныя будынкі, аграпрадпрыемствы», – распавёў Алег Кіпер у тэлеграме.
Паводле прэс-службы Сілаў абароны поўдня Украіны, у Адэскай вобласці ноччу 6 верасня былі знішчаныя 15 беспілотнікаў узору «Shahed-136». Агулам Расея запусціла па Украіне 25 ударных БПЛА.
Акрамя беспілотнікаў, паводле паветраных сіл Украіны, расейцы ўдарылі ракетамі: па ўкраінскіх гарадах былі выпушчаныя 7 крылатых ракет Х-101/Х-555/Х-55, 1 балістычная ракета «Іскандэр-М». Усе ракеты былі збітыя СПА. Абломкі адной з ракет справакавалі пажар у Кіеўскай вобласці на тэрыторыі гандлёвага прадпрыемства. Ахвяраў няма.
Марыя Міхалевіч belsat.eu
