Адкуль беларусы даведваюцца пра навіны, ці саспелі яны да рэформаў і ці гатова Беларусь жыць без Расеі? На гэтыя пытанні паспрабавалі адказаць сацыёлагі ў сваім новым даследаванні. Chatham House (Каралеўскі брытанскі аналітычны цэнтр у галіне міжнародных адносін) апытаў 813 рэспандэнтаў з 24 студзеня па 3 лютага 2023 года з дапамогай інтэрнет-інтэрв’ю (CAWI). Усе апытаныя пражываюць у гарадах і з’яўляюцца карыстальнікамі інтэрнэту. Прыводзім самае цікавае.
Адкуль беларусы даведваюцца аб тым, што адбываецца
Гарадскія беларусы часцей атрымліваюць навіны з расейскіх і беларускіх тэлеканалаў (іх аўдыторыя амаль аднолькавая па колькасці – 34% і 32% адпаведна).
Аўдыторыя недзяржаўных СМІ складае 20%, яшчэ 26% выкарыстоўваюць абодва тыпы крыніц. Кожны пяты апытаны не цікавіцца навінамі наогул, праглядае праграмы навін і сайты радзей чым раз на тыдзень.
Аўдыторыі дзяржаўных і недзяржаўных СМІ складаюць дзве інфармацыйныя бурбалкі ў беларускім грамадстве, узаемна не давяраючыя альтэрнатыўным тыпам крыніц. Прычым такі недавер больш характэрны для аўдыторыі недзяржаўных медыяў. Яны амаль цалкам не давяраюць тэлебачанню, а ў параўнанні з мінулай хваляй даследаванні ў лістападзе 2022 года сталі значна менш давяраць «новым нейтральным медыя» (Смартпрэс, tochka.by, Белнавіны).
Беларусы саспелі да рэформаў
Эксперты адзначаюць: беларускае грамадства чакае рэформаў. Толькі 15% беларускіх гараджанаў лічаць, што Беларусі яны не патрэбныя. Гэта сведчыць аб грамадскім кансэнсусе неабходнасці змен. Нават аўдыторыя дзяржаўных медыяў часцей кажа, што рэформы патрэбныя (41% аўдыторыі дзяржсмі), чым не патрэбныя (23%). Больш за палову выбаркі, то бок кожны другі рэспандэнт выступае за маштабныя, але паступовыя рэформы, якія як павялічваюць, так і зніжаюць ролю дзяржавы ў залежнасці ад сферы. За рэформы толькі ў асобных сферах выказаўся кожны пяты. За хуткія рэформы выступае кожны дзясяты.
Беларусы ў сваёй большасці не задаволеныя эканамічнай сітуацыяй, лічаць, што ў Беларусі занадта шмат чыноўнікаў і дзяржаўных структур, а таксама занадта высокія падаткі.
Тры чвэрці беларускіх гарадскіх жыхароў (74%) лічаць, што за сярэднюю беларускую пенсію цяжка годна пражыць. 65% мяркуюць, што ў Беларусі зашмат чыноўнікаў і дзяржаўных структур. Пры гэтым амаль кожны другі (45%) лічыць, што большасць чыноўнікаў, у тым ліку высокапастаўленых, некампетэнтная.
Больш за палову апытаных (56%) адзначылі, што ў краіне вельмі высокія падаткі. Толькі 23% падтрымлівае такія дзеянні дзяржавы як павышэнне пенсійнага ўзросту, скарачэнне дэкрэтнага адпачынку ці павышэнне падаткаў.
Беларусы часцей згодныя, чым нязгодныя са сцвярджэннямі аб нераўнамернасці міжрэгіянальнага размеркавання бюджэту (большая частка грошай ідзе ў Менск, а абласным і асабліва раённым гарадам застаецца мала сродкаў) і сцвярджэннем, што «у Беларусі памерла вёска».
Пры гэтым сітуацыю з карупцыяй беларусы часцей ацэньваюць пазітыўна, чым негатыўна. Беларусы не лічаць, што ў Беларусі створаны добрыя ўмовы для бізнесу.
Беларусы не давяраюць дзяржаве
Аўдыторыя недзяржаўных медыя часцей за астатніх крытыкуюе дзейную сістэму кіравання і эканамічную сітуацыю ў краіне, аднак доля крытыкаў высокая нават сярод лаяльнай уладзе аўдыторыі.
Аб пэўным разрыве паміж дзяржавай і людзьмі сведчыць тое, што кожны другі лічыць, што «просты чалавек у Беларусі не абаронены ад самаўпраўнасці ўладаў». Большасць гараджанаў нязгодныя са сцвярджэннем, што «калі чалавек добра зарабляе, ён павінен быць удзячны дзяржаве».
Ці гатова Беларусь жыць без Расеі
У знешняй палітыцы папулярнай застаецца ўстаноўка на нейтралітэт. Дзве трэці беларускіх гарадскіх жыхароў мяркуе, што Беларусь павінна мець аднолькава добрыя адносіны і з Захадам, і з Расеяй. Але калі нельга выбраць нейтральнасць, аўдыторыя дзяржСМІ часцей адзначае негатыўнае стаўленне да Захаду і пазітыўнае да Расеі, а аўдыторыя недзяржаўных СМІ – наадварот.
38% беларускіх гарадскіх жыхароў лічаць, што Беларусь не выжыве без расейскай дапамогі пры 31% нязгодных і 28% тых, хто не змог адказаць.
І яшчэ некалькі тэзаў
Каля паловы апытаных згодна з меркаваннем, што пасля выбараў зʼехала шмат таленавітых людзей.
Кожны чацвёрты лічыць, што ні ва ўлады, ні ў апазіцыі няма бачання будучага краіны.
Больш за чвэрць апытаных (27%) выказала абыякавасць да таго, які сцяг будзе ў краіне.
Толькі кожны шосты (16%) пагадзіўся з тым, каб беларуская мова была адзінай дзяржаўнай.
Кожны чацвёрты выказаўся супраць выкарыстання смяротнага пакарання ў Беларусі.
Толькі 14% вераць у афіцыйную статыстыку смерцяў ад каронавіруса.
Пры гэтым ёсць сферы, якія беларускія гарадскія жыхары ацэньваюць адносна нядрэнна. Напрыклад, школьную адукацыю ці медычныя паслугі. Таксама 54% рэспандэнтаў лічаць, што ў Беларусі добрыя дарогі.
СП belsat.eu