За першыя чатыры месяцы 2025 года прадпрыемствы ў Беларусі значна часцей звальнялі рабочых, чым наймалі. Пра гэта сведчаць звесткі Нацыянальнага статыстычнага камітэту. Інфармацыя, аднак, не датычыць мікра- і малых прадпрыемстваў без ведамаснай падпарадкаванасці.
За студзень – красавік у Беларусі былі прынятыя на працу 196,33 тыс. асобаў, а звольненыя – 209,46 тыс. Звальненняў выйшла на 13,13 тыс. больш.
У студзені – сакавіку колькасць працаўладкаванняў перавышала колькасць звальненняў, але ў красавіку звольненых было больш за прынятых на працу на 17,76 тыс. асобаў (70,23 тыс. супраць 52,47 тыс.). І гэта пры тым, што колькасць працаўладкаванняў паводле вынікаў чатырох месяцаў адносна аналагічнага перыяду 2024 года вырасла амаль на 9 %. Колькасць звальненняў таксама вырасла – на 6,5 %.
З 209,46 працаўніка, звольненых за студзень – красавік, за прагул ды іншыя парушэнні працоўнай дысцыпліны працу страцілі 11,75 тыс. асобаў; праз ліквідацыю арганізацыі, скарачэнне колькасці або штату працаўнікоў – 750. Пры гэтым у гадавым выражэнні колькасць парушальнікаў павялічылася на 0,2 %, а скарочаных – зменшылася на 12,8 %.
У красавіку ў эканоміцы Беларусі былі занятыя 4,136 млн асобаў. Гэта на 10,4 тыс. менш, чым у сакавіку.
Праз масавую эміграцыю беларусаў пасля 2020 года ўлады сутыкнуліся з істотным кадравым дэфіцытам. Зменшыць яго спрабуюць з дапамогай пенсіянераў і мігрантаў. Станам на 3 чэрвеня ў краіне шукаюць 209 903 працаўнікоў.
З 1 студзеня ў Беларусі ўказам № 402 аб сацыяльным падтрыманні адмянілі абмежаванні на памер пенсіяў для асобаў сталага веку, якія працягваюць працаваць. Гэта выклікала рост колькасці працоўных пенсіянераў.
Таксама Аляксандр Лукашэнка справакаваў вялікую незадаволенасць у беларускага грамадства пасля таго, як паабяцаў прывезці ў Беларусь 150 тысячаў пакістанскіх працоўных мігрантаў на замену тым беларусам, якія з'ехалі праз ягоную палітыку.
Якуб Хруст belsat.eu
