У Нацыянальным банку паведамілі, што за два месяцы года імпарт Беларусі перавысіў экспарт на $ 443 млн. Сальда не можа выкараскацца з мінусу ўжо паўгода.
Вонкавы гандаль – адна з нешматлікіх крыніцаў валюты для Беларусі, і ўжо шэсць месяцаў запар гэтая крыніца толькі вымывае грошы з краіны.
Апошні раз прыбытак быў у студзені – жніўні летась, тады наш экспарт перавысіў імпарт на $ 187 млн. Пасля гэтага – усцяж дэфіцыт. За два першыя месяцы года ён перавысіў $ 443 млн.
Як падлічыў Нацбанк, у студзені – лютым беларускі экспарт упаў на 3,9 % год да года, а імпарт вырас на 3,6 %.
Асобна ў таварах нагодаў для гонару няма: пастаўкі за мяжу скараціліся на 8 %, а вось імпартнага завезлі на 1,5 % больш. У выніку розніца паміж экспартам і імпартам склала $ 907 млн не на нашую карысць. За той жа час летась сальда таксама было стратнае, аднак амаль утрая меншае.
У паслугах не ўсё так кепска, аднак і яны не выратавалі краіну ад праядання валюты. Тут экспарт вырас на 15 %, а вось імпарт – на 18,2 %. Гандаль паслугамі прынёс $ 464 млн, што зусім крыху больш, чымся было летась.
Раней асобную статыстыку гандлю таварамі ў студзені – лютым даваў Белстат, і гэтыя звесткі трохі адрозніваюцца ад нацбанкаўскіх. Паводле статыстычнага ведамства, экспарт скараціўся на 8,3 %, імпарт вырас на 1,6 %. Розніца паміж прададзеным за мяжою і прывезеным у краіну склала $ 1,023 млрд.
Улады старанна хаваюць, чым і з якімі краінамі гандлюе Беларусь. Незалежным эканамістам застаецца толькі рабіць здагадкі, каб паспрабаваць растлумачыць вынікі вонкавага гандлю.
Эксперт даследчага цэнтру BEROC Дзмітрый Крук раней казаў «Белсату», што, падобна, Беларусь мае праблемы з продажам гэтак званых стратэгічных тавараў – нафтапрадуктаў і калійных угнаенняў.
Адначасова сціскаецца галоўны для нашай краіны рынак збыту – расейскі. Тамтэйшы Цэнтрабанк змагаецца з ростам цэнаў жорсткаю манетарнаю палітыкаю. Крэдыты ў Расеі цяпер дарагія, грошай у насельніцтва і прадпрыемстваў стала менш, вось і не купляюць столькі, як раней. Адпаведна, знізіўся попыт і на беларускія тавары.
Звычайна, калі імпарт перавышае экспарт, краіны кампенсуюць розніцу, прыцягваючы грошы з-за мяжы – інвестыцыі і крэдыты. У цяперашніх уладаў Беларусі, якія пасварыліся з «загніваючым Захадам» і распужалі інвестараў, застаюцца толькі два варыянты: ісці з працягнутай рукою ці ў Расею, ці ў Кітай, адзначаў эканаміст Крук.
Зрэшты, леташні дэфіцыт вонкавага гандлю пакрылі беларусы, калі прынеслі заначкі ў банкі: фізічныя асобы прадалі валюты на $ 1,7 млрд болей, чымся купілі, пры тым, што вонкавы гандаль вымыў з краіны $ 1,3 млрд.
Аднак гэтая крыніца замежных грошай не надзейная і не вечная. У студзені – сакавіку сёлета беларусы прадалі валюты толькі на $ 48,9 млн больш, як набылі.
Дзмітрый Крук не выключаў, што, каб хоць неяк спыніць выцек валюты з краіны, улады кінуцца штучна абмяжоўваць імпарт. Падобна, да загаду чыноўнікаў «не пушчаць» засталося не так шмат часу, пагатоў Беларусь можа заваліць кітайскімі таварамі ў выніку гандлёвай вайны прэзідэнта ЗША Доналда Трампа.
Сцяпан Кубік belsat.eu
