Прадстаўніцтва нацыянальнага адраджэння збірае базу беларускіх арганізацыяў, што могуць атрымліваць фінансавае падтрыманне праз пералік ім да 1,5 % падаходнага падатку. Што важна: гэта не даплата да вашых падаткаў зверху, адсотак ужо закладзены.
На сёння ў складзенай базе беларускіх арганізацыяў – 16 праектаў з Літвы і Польшчы, і спіс працягвае папаўняцца, кажуць прадстаўнікі ў нацыянальным адраджэнні.
Нагадаем: кожны, хто працуе ў Польшчы, можа скіраваць да 1,5 % сваіх абавязковых падаткаў на дабрачыннасць. «Белсат» ужо рабіў пакрокавую інструкцыю, як гэта можна зрабіць.
Каму магчыма скіроўваць свае падаткі?
У Польшчы і Літве працуюць некаторыя беларускія фонды і дабрачынныя арганізацыі, якім можна дапамагчы сваймі падаткамі. Гэта можа быць толькі грамадская арганізацыя, што не займаецца камерцыйнаю дзейнасцю, мае празрыстую справаздачнасць і працуе ў краіне не менш за два гады.
У Польшчы такія арганізацыі маюць свой нумар KRS і пералічаныя вось тут і тут. Знайсці арганізацыю, якой вы хочаце скіроўваць свае падаткі, можна паводле фільтраў – лакацыі, сферы дзейнасці, назвы.
Адныя атрымліваюць грошы самастойна, другія – праз партнёрства з іншымі арганізацыямі, што маюць нумар KRS.
Як пералічыць грошы ў Польшчы?
Наёмныя працаўнікі ў Польшчы атрымліваюць свае падаткавыя дэкларацыі PIT штогод пасля 15 лютага (індывідуальныя прадпрымальнікі – jednoosobowa działalność gospodarcza – запаўняюць самі). Праз гэтую дэкларацыю вы можаце некалькімі клікамі скіраваць свае грошы на дабрачыннасць.
Для гэтага ў пункце 147 дэкларацыі ўвядзіце нумар KRS, у пункце 148 – «1,5 %» ці іншы памер, не вышэйшы за гэты, у пункце 149 – мэту скіравання, калі хочаце дапамагчы камусьці канкрэтнаму ці дапамагаеце суполцы праз яе партнёраў). У пункце 151 пазначце свой мэйл – туды вам раз на год будзе прыходзіць справаздача, на якія мэты пайшлі вашыя грошы.
Трэба адзначыць, што 1,5 % падаткаў – гэта максімальны памер дапамогі праз гэтую сістэму, але вы можаце паставіць розныя значэнні. І нават скіроўваць 0,75 % адной арганізацыі, а рэшту – другой. Ці скіроўваць 1 % куды захочаце, а астатнія 0,5 % размяркуе сама падаткавая.
Калі вы пастанавілі скіраваць грошы на дапамогу беларусам праз іншую арганізацыю-партнёра, у дэкларацыі абавязкова пазначайце мэту, інакш грошы пойдуць партнёрам.
Зрабіць гэта лепш да 30 красавіка, але выбар можна змяніць у любы час, нават пасля запаўнення дэкларацыі.
Тэса Анэйда belsat.eu