Еўрапейская камісія падрыхтавала чарговы, ужо 18-ы, пакет санкцый у адказ на працяг агрэсіі Расеі супраць Украіны і падтрымку гэтай агрэсіі з боку Беларусі. Новыя абмежаванні скіраваныя на далейшае аслабленне ваенна-прамысловага патэнцыялу абедзьвюх краін.
Як стала вядома журналістам Радыё «Свабода» ад інфармаваных крыніц у Бруселі, у праекце санкцыйнага пакета прапануецца ўвядзенне поўнай забароны на ўсе банкаўскія аперацыі з беларускімі фінансавымі структурамі. Раней санкцыі датычыліся толькі адключэння асобных банкаў ад сістэмы SWIFT, але цяпер гаворка ідзе пра поўнае блакаванне транзакцый.
У пераліку санкцыйных прапаноў таксама згадваюцца чатыры беларускія кампаніі, звязаныя з абаронным сектарам. Назвы гэтых суб’ектаў будуць апублікаваныя пазней, аднак ужо цяпер вядома, што ім пагражае замарожванне актываў і забарона на вядзенне бізнесу ў межах Еўразвязу.
Акрамя таго, упершыню прапануецца цалкам забараніць імпарт зброі з тэрыторыі Беларусі на тэрыторыю ЕЗ.
Еўракамісія таксама мае намер пашырыць кантроль над таварамі падвойнага прызначэння, якія могуць выкарыстоўвацца для ўмацавання беларускай ваенна-прамысловай базы. Гэта, у прыватнасці, машыны, хімікаты, асобныя тыпы металаў і пластыкаў. Таксама прапануецца забараніць транзіт шэрагу такіх тавараў праз Беларусь.
Як тлумачыць еўрапейскі рэдактар Радыё Свабодная Еўропа / Радыё Свабода Рыкард Юзвяк, гэты пакет павінен быць узгоднены прадстаўнікамі ўсіх 27 краін Еўразвязу. Паводле яго слоў, рашэнне чакаецца да канца чэрвеня.
У папярэднім, 17-м пакеце, зацверджаным 20 траўня, былі ўведзеныя, у тым ліку, санкцыі супраць Менскага завода колавых цягачоў. У абгрунтаванні адзначалася, што прадпрыемства «распрацоўвае ваенную тэхніку для Узброеных сіл Расейскай Федэрацыі і падтрымлівае абараназдольнасць Расеі».
У канцы траўня з’явіліся паведамленні, што Еўразвяз працуе над 18-м пакетам санкцыяў. У яго рамках разглядалася магчымасць выключэння больш як 20 банкаў з міжнароднай аплатнай сістэмы SWIFT і забарона на газаправоды «Nord Stream». Таксама паведамлялася, што ЕЗ узважваў новыя гандлёвыя абмежаванні на суму каля 2,5 млрд еўраў, каб яшчэ больш скараціць даходы Расеі і яе здольнасць завалодаць тэхналогіямі, неабходнымі для вытворчасці зброі.
Адной з мер, якія разглядаліся ў рамках новага пакету, Еўракамісія таксама планавала знізіць лімітавую цану на нафту для краінаў «Вялікай сямёркі» прыкладна да 45 долараў з сённяшніх 60. Але для гэтага можа спатрэбіцца згода ЗША. Пакуль узгадніць гэты захад не атрымліваецца.
Раман Шавель
