За год запазычанасць у спажывецкіх крэдытах вырасла ўдвая, у крэдытах на нерухомасць – на 36 %. Зрэшты, хаця тэмпы выдавання грошай беларусам застаюцца высокімі, крытычнымі гэтыя паказнікі назваць нельга, сказала «Белсату» эканамістка Настасся Лузгіна.
Нацбанк падлічыў, што агульная крэдытная запазычанасць фізічных асобаў перавысіла 26,7 млрд рублёў, рост у параўнанні з леташнім сакавіком – 27,6 %.
Больш актыўна беларусы бралі грошы на спажывецкія тавары, чымся на нерухомасць. Запазычанасць у частцы спажывецкіх крэдытаў павялічылася ўдвая, а ў частцы нерухомасці – на 36 %.
«Банкі працягваюць актыўна крэдытаваць насельніцтва, асабліва на спажывецкія патрэбы», – канстатавала ў каментары «Белсату» эканамістка даследчага цэнтру BEROC Настасся Лузгіна.
,,«Што беларускія ўлады хвалюе, дык гэта менавіта актыўны рост спажывецкіх крэдытаў. Мы бачым, што ад пачатку года ідзе рост прыкладна ў тых жа аб'ёмах, што і летась. Запазычанасць у спажывецкіх крэдытах з леташняга студзеня вырасла больш як удвая. Гэта вельмі высокі паказнік».
Што праўда, асобна ў студзені і лютым беларусы ўзялі менш пазыкаў у параўнанні з снежнем, але калі параўноўваць з пачаткам мінулага года, то рост заўважны. Напрыклад, у лютым фізічныя асобы аформілі спажывецкіх крэдытаў на 49 % болей год да года, а на нерухомасць – удвая болей.
Беларусы назапашваюць запазычанасць перад банкамі, нягледзячы на рост адсоткавых ставак новых крэдытаў, хай і неістотны.
«Рост заробкаў пашырае магчымасці, каб узяць крэдыт на большую суму, і стаўкі застаюцца прымальнымі. Людзі працягваюць браць крэдыты», – кажа Лузгіна.
Яна адзначыла, што крокі Нацбанку ў тым, каб зрабіць грашовую палітыку больш жорсткай, вельмі і вельмі асцярожныя, а надоечы рэгулятар не стаў павышаць гэтак званыя велічыні стандартнай рызыкі, ад якіх залежаць крэдытныя стаўкі. У красавіку паказнік застанецца на тым жа ўзроўні, што і ў сакавіку.
Пры гэтым пратэрмінаваная запазычанасць фізічных асобаў застаецца вельмі нізкаю, крыху больш за 44 млн рублёў, падкрэсліла суразмоўніца «Белсату»:
«Беларусы – свядомыя і адказныя. Летась пратэрмінаваная запазычанасць складала 0,16 % ад агульнай запазычанасці, цяпер – 0,17 %. Гэта вельмі мала, таму можна казаць, што насельніцтва вельмі адказна ставіцца да крэдытаў і намагаецца своечасова іх вяртаць. Дарэчы, у нас заўсёды так было. Людзі не хочуць псаваць сваю крэдытную гісторыю».
Сцяпан Кубік belsat.eu
