Мастак Дэ Лёс разам з «Белсатам» сочыць за галоўнымі падзеямі, што ўплываюць на жыццё беларусаў, выклікаюць шырокі рэзананс у грамадстве ці проста маюць вялікае значэнне тут і цяпер.
Чарнецкі замест Маркевіча
Аляксандр Лукашэнка прызначыў новага міністра культуры. Замест Анатоля Маркевіча гэтую пасаду зойме актор тэатру Руслан Чарнецкі.
У недзяржаўных медыях гавораць, што Чарнецкі блізкі да Ганны Сялук – гэта творчы псеўданім жонкі Дзмітрыя Лукашэнкі. Год таму Руслан Чарнецкі прызнаваўся ў праграме «Маркаў. Нічога асабістага», што ў 2020 годзе ні на секунду не сумняваўся ў тым, што абраў «правільны бок» і падтрымаў рэжым.
Крэдытны бум у Беларусі
Агульная крэдытная запазычанасць беларусаў на 1 лістапада дасягнула Br 24,9 млрд, павялічыўшыся год да года на 26,2 %.
Экспертка Настасся Лузгіна тлумачыць, чаму крэдытны партфель беларусаў расце і ці не праблема для эканомікі такая запазычанасць.
Законнае пірацтва
Улады Беларусі на два гады падоўжылі дзеянне закону, што легалізуе інтэлектуальнае пірацтва і «шэры» імпарт.
У прыватнасці, закон дазваляе выкарыстоўваць без дазволу праваўладальнікаў розныя аб'екты інтэлектуальнай уласнасці, у тым ліку праграмнае забеспячэнне, аўдыявізуальныя, музычныя творы, перадачы арганізацыяў трансляцыі. Таксама ім дазваляецца так званы паралельны імпарт, калі тавары могуць увозіцца з трэціх краінаў без дазволу праваўладальніка гандлёвай маркі ў выпадках, калі той спыніў іх пастаўкі ў Беларусь.
Богаўгодны бізнес
Свята-Елісавецінскі манастыр, што падтрымлівае вайну ва Украіне, зладзіў гандаль на калядным кірмашы ў польскім Шчэціне. Калі на гэта звярнулі ўвагу беларускія актывісты, мясцовыя ўлады пастанавілі спыніць супрацу з манашкамі.
Свята-Елісавецінскі манастыр – бадай, самы вядомы ў Беларусі памагаты расейскім вайскоўцам. Там збіраюць грошы, медыкаменты, адзенне і абутак, а таксама заахвочваюць пісаць лісты падтрымання (іх падпісваюць «Дорогому солдату из Белой Руси» або «Дорогому солдату из Белоруссии»), што перадаюць жаўнерам.
Выцінанка ўвайшла ў спіс культурнай спадчыны чалавецтва
ЮНЭСКО дадала беларускую выцінанку ў спіс нематэрыяльнай культурнай спадчыны чалавецтва. У гэты спіс беларускі феномен увайшоў пад назваю «Выцінанка – традыцыйнае мастацтва выразання з паперы ў Беларусі».
Выцінанка з'явілася ў XVI стагоддзі. Гэты элемент беларускай культуры можна сустрэць у афармленні дамоў і грамадскіх месцаў, у тэатральных дэкарацыях.
Дэ Лёс belsat.eu
