Гаворка пра 1500 чалавек
Святлана Ціханоўская агучыла колькасць беларускіх добраахвотнікаў, якія цяпер змагаюцца на баку Украіны. Лідарка дэмакратычнай Беларусі ў інтэрв’ю газеце «Corriere della Sera» адзначыла, што гаворка пра 1500 чалавек.
Святлана Ціханоўская адзначыла, што беларусы з самога пачатку вайны пачалі актыўна дапамагаць Украіне. Такім чынам быў арганізаваны батальён імя Каліноўскага ды іншыя фармаванні. На пачатак чэрвеня, паводле Ціханоўскай, беларускія ўтварэнні налічваюць 1500 чалавек. Яны месцяцца ў розных гарадах краіны пад наглядам украінскага войска.
Таксама палітык адзначыла, што колькасна беларускія адзінкі пастаянна растуць:
,,«Многія ў Беларусі хочуць дапамагчы Украіне і ў цяперашні час праходзяць навучанне ў іншых краінах. Колькі іх і дзе яны, мне не дазваляецца казаць. Часта гэта людзі, якія маюць патрэбу ў навучанні, бо ў іх няма досведу вайны. Але, напэўна, колькасць беларускіх байцоў на баку Украіны будзе расці».
Нагадаем, што 24 лютага пачалося поўнамаштабнае ўварванне Расеі ва Украіну. Уладзімір Пуцін агучыў зварот пра пачатак «спецыяльнай вайсковай аперацыі», якая ставіла за мэту заняць значныя тэрыторыі Украіны, у тым ліку сталіцу, Кіеў, за 3–7 дзён. Вайна цягнецца больш за 100 дзён. Войскі РФ здзяйснялі агрэсію таксама з тэрыторыі Беларусі.
Раман Лугоўскі belsat.eu
