WHO ацэньвае рызыку на глабальным узроўні як умераную
За тыдзень выяўленых выпадкаў воспы малпаў стала ўтрая больш.
Сусветная арганізацыя здароўя (WHO) выдала чарговую справаздачу пра выбух малпавай воспы сярод людзей. На 4 чэрвеня было вядома пра 780 лабараторна пацверджаных выпадкаў гэтай хваробы ў людзей у 27 краінах. Найбольш – у Вялікай Брытаніі (207), Іспаніі (156) і Партугаліі (207). У Канадзе выявілі 58 выпадкаў, у той час як у Злучаных Штатах – толькі 19.
Большасць выпадкаў былі выяўленыя ў мужчынаў, якія маюць сексуальныя кантакты з іншымі мужчынамі. Але хваробу выяўляюць не толькі ў такіх асобаў. Вірус перадаецца не толькі плоцевым шляхам, а і проста ад цесных кантактаў між людзьмі або, напрыклад, праз укусы жывёлінаў і забруджаныя аб’екты.
Хоць выяўляюць заходнеафрыканскую галіну віруса, большасць выпадкаў была ў асобаў, якія падарожнічалі ў Еўропе ці Паўночнай Амерыцы, а не ў Заходняй ці Цэнтральнай Афрыцы, дзе вірус эндэмічны (прысутны пастаянна). У эндэмічных краінах з пачатку года да 1 чэрвеня выявілі 44 пацверджаныя выпадкі, таксама былі 1408 выпадкаў падазрэння на воспу малпаў (1284 з іх – у Дэмакратычнай Рэспубліцы Конга) і 66 смерцяў, якія могуць быць звязаныя з хваробаю.
«Раптоўнае і нечаканае з’яўленне воспы малпаў адначасова ў некалькіх неэндэмічных краінах сведчыць пра тое, што магла быць незаўважная перадача за невядомы час, пасля чаго адбыліся падзеі, што ўзмацнілі перадачу віруса», – піша WHO.
WHO ацэньвае рызыку на глабальным узроўні як умераную. Эпідэмічная і лабараторная карціна, адзначае WHO, пакуль няпоўная, а колькасць выпадкаў можа быць недаацэненая праз адсутнасць ранняга клінічнага распазнавання інфекцыі – вірус проста не шукалі па-за межамі эндэмічных краінаў. Рызыка ў тым, што вірус можа «прыжыцца» ў новых рэгіёнах, але ад віруса бароніць ужо існая вакцына ад натуральнай воспы (якую перасталі калоць пасля таго, як чалавецтва перамагло натуральную воспу ў канцы 1970-х), супраць віруса дзеюць лекі ад натуральнай воспы.
Алесь Наваборскі belsat.eu
