Міністр замежных справаў Арменіі Арарат Мірзаян не прыедзе на паседжанне Савету міністраў замежных справаў АДКБ, што пройдзе 21 чэрвеня ў Алматы. Пра гэта паведамляе «Арменпресс» са спасылкаю на прэс-сакратара МЗС Арменіі Ані Бадальян.
Плануецца, што на паседжанні абмяркуюць міжнароднае развіццё, сітуацыю ў рэгіёне, механізмы ўзмацнення каардынацыі ў сферы вонкавай палітыкі і падвядуць вынікі супрацы ў рамках АДКБ. Савет міністраў замежных справаў мае ўхваліць шэраг праектаў, што будуць вынесеныя на зацверджанне на чарговай сесіі АДКБ, якая адбудзецца 28 лістапада 2024 года.
Арменія абвясціла аб замарожванні сяброўства ў АДКБ у лютым 2024 года, а яшчэ ў лістападзе 2023 года прэм’ер-міністр Арменіі Нікол Пашыньян не прыехаў у Менск на саміт АДКБ праз пастанову «не прысутнічаць на гэтых сустрэчах».
12 чэрвеня 2024 года падчас выступу ў парламенце Нікол Пашыньян зноў загаварыў аб магчымым выхадзе з АДКБ. Тады ж ён рэзка раскрытыкаваў палітыку Аляксандра Лукашэнкі, які падтрымліваў Азербайджан падчас ваеннага канфлікту Арменіі і Азербайджану.
«Адзін з лідараў АДКБ заяўляе, што ён удзельнічаў у рыхтаванні 44-дзённай вайны, натхняў, верыў і жадаў перамогі Азербайджану. Пасля гэтага я павінен пайсці і сесці з Лукашэнкам у фармаце АДКБ ды абмеркаваць любое пытанне? Я фіксую, што ніколі не буду наведваць Беларусі, бо там прэзідэнтам застаецца Аляксандр Лукашэнка. Я заяўляю, што на гэты момант ніхто з афіцыйных прадстаўнікоў Арменіі наогул не наведае Беларусі», – сказаў Пашыньян.
Прэм’ер таксама адзначыў, што дзве краіны з АДКБ удзельнічалі ў рыхтаванні Азербайджанам вайны ў Нагорным Карабаху.
Арсен Рудэнка belsat.eu