Дзярждэп: Лукашэнка аддае прыярытэт інтарэсам Пуціна перад інтарэсамі свайго народу
Кіраўнік прэс-службы Дзяржаўнага дэпартаменту ЗША Мэт’ю Мілер падчас брыфінгу 29 чэрвеня пракаментаваў прысутнасць ПВК Вагнэра ў Беларусі.
«Рашэнне запрасіць ПВК Вагнэра ў Беларусь стала яшчэ адным знакам, што рэжым Лукашэнкі аддае прыярытэт інтарэсам Пуціна перад інтарэсамі свайго народу. Прысутнасць Вагнэра ніколі не спрыяла стабільнасці, дзе б яны ні былі», – сказаў ён.
Пры гэтым Мэт’ю Мілер (Matthew Miller) адзначыў, што не мае звестак пра месцазнаходжанне Яўгенія Прыгожына або іншых вагнэраўцаў.
Улады Беларусі пацвярджаюць, што ў краіну запрасілі лідара мяцежных баевікоў Групы Вагнэра Яўгенія Прыгожына, і нават заяўляюць, што гатовыя прыняць баевікоў у беларускае войска. На момант публікацыі няма пацверджанняў таго, што баевікі і асабіста Прыгожын былі ў Беларусі, але ёсць ускосныя сведчанні: самалёты Прыгожына заляталі ў Беларусь.
Расейскія медыі паведамілі 26 чэрвеня аб будаўніцтве лагеру для баевікоў Групы Вагнэра пад Асіповічамі. Паводле крыніцы ў лясніцтве, лагер разлічаны на 8 тысяч ложкаў. У Асіповіцкім райвыканкаме і ў Міністэрстве лясной гаспадаркі Беларусі заявілі, што інфармацыі аб такім лагеры не маюць.
Якуб Хруст belsat.eu
