«Я не зразумела пытання». Арына Сабаленка – пра нейтральны статус на «Australian Open»
Пасля перамогі на Адкрытым чэмпіянаце Аўстраліі журналісты спыталі беларускую тэнісістку Арыну Сабаленку пра нейтральны статус на турніры, піша Tribuna.com. Спачатку яна сказала, што не зразумела пытання, а потым заявіла: «Усе па-ранейшаму ведаюць, што я беларускі гулец, вось і ўсё».
На прэс-канферэнцыі пасля пераможнага для Арыны Сабаленкі фіналу «Australian Open» журналісты спыталі яе пра нейтральны статус на турніры. Tribuna.com перадае дыялог карэспандэнта і тэнісісткі:
– У пятніцу вы сказалі, што калі вы пераможаце, то скажаце, як гэта – перамагчы як нейтральны спартсмен. Я задаю гэтае пытанне зноў. Ці дзіўна гэта – перамагчы і не мець недзе свайго сцяга, не мець BLR на трафеі пасля свайго імя? Гэта нешта адбірае?
– Прабачце, я не зразумела пытання.
– Вам забаронена мець надпіс «Беларусь» дзе-небудзь на стадыёне.
– ОК.
– Цікава, ці адбірае гэта нешта ад таго, чаго вы дасягнулі, ці зменіць гэта нешта ўдома?
– Я думаю, што ўсе па-ранейшаму ведаюць, што я беларускі гулец. Вось і ўсё.
Сабаленка, як і Вікторыя Азаранка, якая вылецела з турніру ў паўфінале, выступала ў нейтральным статусе – праз суўдзел Беларусі ў расейскай агрэсіі. На кубку выгравіравалі імя пераможцы без пазначэння краіны.
Беларускае дзяржаўнае тэлебачанне зладзіла пірацкую трансляцыю фіналу, не маючы правоў на паказ: скарысталіся нядаўна ўхваленым законам аб шэрым імпарце. Падчас гульні ў эфір трапіў голас, відаць, рэжысёра, які нецэнзурна заклікаў каментатара крычаць у выпадку перамогі Сабаленкі.
Сёння ж для чэмпіёнкі зладзілі традыцыйную фотасесію. У бледна-ружовай сукенцы Сабаленка адкаркоўвала шампанскае і плавала з кубкам на гандоле ў батанічным садзе Мельбурну.
«Я ўсё яшчэ адчуваю сябе быццам на іншай планеце, спрабую зразумець, што толькі што адбылося. Гэта найлепшая раніца ў маім жыцці. Яна такая прыгожая», – цытуе спартсменку сайт wtatennis.com.
Сабаленка – падпісантка праўладнага ліста спартоўцаў. Раней Telegram-канал «Пул первого» запосціў відэа з радасным Аляксандрам Лукашэнкам, які выпіў кілішак нейкага напою з нагоды перамогі Сабаленкі разам з бізнесоўцам Сяргеем Цяцерыным. На стале перад імі ляжаў шпіц.
Сяргей Крот belsat.eu
