У Беларусі 1 траўня адзначаецца дзяржаўнае «Свята працы». У Савецкім Саюзе святу прыдумалі лозунг «Мир, труд, май». Сёлета – падчас вайны ва Украіне – улады Гарадзенскай вобласці вырашылі зрабіць акцэнт на першым слове з таго лозунгу.
Анонсы святочных імпрэзаў на 1 траўня ў 2023 годзе збольшага звычайныя: узнагароджанні працоўных дзяржаўнымі прафсаюзамі, ускладанні кветак, канцэрты, кірмашы, выставы і конкурсы. Ды ў афішах назіраюцца дзве асаблівасці.
Першая – практычна нідзе ў афішах канцэртаў не называюць выступоўцаў. Станам на 28 красавіка ў анонсах за рэдкім выключэннем пішуць пра канцэрты абстрактных «папулярных артыстаў» ці «прафсаюзных творчых калектываў».
Другое – у шэрагу гарадоў пройдуць «Забегі міру». Імпрэзаў пад такой назвай на 1 траўня ўлады раней не ладзілі, хоць, напрыклад, ладзілі «Забегі адважных» да Дня Перамогі ці «Beauty run» («Забег прыгажосці») да 8 сакавіка. Дэталяў пра «Забегі міру» не анансуюць – хіба час старту, але амаль нідзе не апісваюць маршрут, дыстанцыю ці спосаб рэгістрацыі да ўдзелу.
«Забегі міру» ладзяць не па ўсёй краіне. Такія забегі анансавалі на момант публікацыі ў Горадні (там пад лозунгамі са словам «мір» плануюць таксама галоўную імпрэзу) і Гарадзенскай вобласці: у Ашмянах, Астраўцы, Воранаве, Шчучыне.
Пры тым у Горадні адразу пасля забегу будуць ускладаць кветкі да помніку ваярам і партызанам, загінулым у Вялікай айчыннай вайне. А ў Салігорску плануюць спартовую эстафету «Май, спорт, труд рядом идут!» – без ніякага міру.
«Забегі міру» праводзяць у час, калі Беларусь саўдзельнічае ў расейскім нападзе на Украіну, улады Беларусі падазраюць у саўдзеле ў ваенных злачынствах, а Беларусь рыхтуецца прымаць і ўжываць расейскую ядравую зброю. У суседняй Расеі тым часам за слова «мір» могуць і аштрафаваць.
Алесь Наваборскі belsat.eu
