У Беластоку, як і па ўсім свеце, 25 сакавіка адзначаецца Дзень Волі. Сотні людзей прыйшлі на Рынак Касцюшкі ў самым цэнтры Беластоку, каб узяць удзел у святочным мітынгу. У гэтым горадзе заўжды было шмат беларусаў, і Дзень Волі ў Беластоку адзначаецца з 1985 года. Цяпер разам з беларусамі на акцыю прыйшлі ўкраінцы і палякі.
У Беластоку адна з самых вялікіх беларускіх дыяспараў за мяжой, яна падрыхтавала цэлы комплекс мерапрыемстваў, прысвечаных 105-годдзю абвяшчэння Беларускай Народнай Рэспублікі. Пікам стаў святочны мітынг, які прайшоў у самым цэнтры Беластоку.
На мітынг прыйшла дачка Паўла Латушкі Яна.
«Гэта вельмі важнае свята для ўсіх беларусаў, гэта наш Дзень Вольнай Беларусі. Я хачу жыць у вольнай і дэмакратычнай Беларусі, таму я сёння прыйшла, мы працягваем змагацца за вольную Беларусь нават тут за мяжой. Я ўпэўнена, што мы паедзем усе разам у новую свабодную краіну, што рэжым падзе даволі хутка. У Менску на такія акцыі хадзілі мае дзядуля і бабуля, цяпер я хаджу. Тата таксама з раніцы мне патэлефанаваў і павіншаваў з гэтым святам», – сказала ў размове з «Белсатам» Яна Латушка.
Сям’я Верамеенка не прапускае нацыянальных акцыяў у Беластоку, тым больш яны не маглі не прыйсці на мерапрыемства, прысвечанае Дню Волі.
«Для мяне гэта самае галоўнае, самае вялікае свята: гэта як нашая мінуўшчына, так і будучыня. Я вельмі спадзяюся, што хутка настане той час, калі мы будзем святкаваць у нашых беларускіх гарадах, як гэта было раней, і як мы зараз святкуем за мяжой», – кажа Вольга Верамеенка.
Сярод удзельнікаў акцыі і былы палітвязень Віктар Пархімчык.
«Дзень Волі – гэта свята, якое абʼядноўвае ўсіх беларусаў. У сённяшняю дату вельмі важныя падзеі адбываліся, і гэта дазваляе мне адчуваць сябе ў супольнасці нашых землякоў беларусаў. Мы, беларусы, мусім быць разам, павінен быць яднаючы фактар, калі яго не будзе, то мы губляемся як нацыя і як людзі, які застаюцца без каранёў. Гэта нашае жыццё і наступных пакаленняў таксама. Трэба ведаць, хто мы», – адзначае былы палітвязень Віктар Пархімчык.
25 сакавіка ў Беластоку адбудзецца святочны канцэрт, а 26-га – беларускі пікнік, на які запрошаныя ўсе ахвотныя.
Алесь Ляўчук belsat.eu
