Кіраўнік памежнай службы Украіны распавёў пра сустрэчу з беларускім калегам перад вайной
Сяргей Дэйнэка, кіраўнік памежнай службы Украіны, апавёў, што перад расейскім нападам ён сустракаўся з беларускім калегам Анатолем Лапо. Украінскі памежнік казаў беларускаму пра напад з боку Расеі, але апошні ў гэта не паверыў, піша выданне «Українська правда».
19 лютага кіраўнік памежнай службы Украіны Сяргей Дэйнэка на мяжы на даручэнне Уладзіміра Зяленскага сустракаўся з кіраўніком памежнага камітэту Беларусі Анатолем Лапо. Украінскі памежнік адзначыў у размове, што нельга парушаць мяжу і спрыяць гэтаму.
«Калега мяне запэўніў, што гэтага «дакладна не адбудзецца». Але з ягонай рэакцыі я ўбачыў, што ён хлусіў. Гэта была апошняя сустрэча і апошняя размова з ім. Я даў яму паслухаць некаторыя матэрыялы, пераслухаў размовы расейскіх вайскоўцаў. Ён пабялеў, пачырванеў, пазелянеў, паабяцаў, што ўвечары таго ж дня дакладзе Лукашэнку. Што ж, мы ўжо бачылі, што было далей», – распавёў Сяргей Дэйнэка.
Кіраўнік памежнай службы Украіны таксама кажа, што ніякія ўмацаванні на мяжы не змогуць цалкам спыніць нападніка, але могуць запаволіць яго наступ.
«На сёння я не бачу пагрозы з боку Беларусі. Калі вы просіце мяне даць гарантыі, што гэтага не адбудзецца, то я не магу. Бо я не разумею, што будзе праз два тыдні. Калі праз два тыдні я ўбачу развіццё сітуацыі, наша выведка будзе працаваць, атрымае планы праціўніка, мапы, схемы, планы наступальнай аперацыі, то я буду вымушаны даводзіць свае высновы вышэйшаму вайскова-палітычнаму кіраўніцтву», – кажа Сяргей Дэйнэка.
Украінскі памежнік дадае, што на тэрыторыі Беларусі няма тых сілаў, каб паспяхова правесці наступальную аперацыю.
Алена Аляксандрава belsat.eu
