Старшыню зліквідаванай уладамі Партыі БНФ, палітзняволенага Рыгора Кастусёва чацвёрты раз адправілі ў штрафны ізалятар на 10 содняў. Пра гэта паведамляе зяць палітыка Зміцер Антончык.
«Рэжым забівае Рыгора Кастусёва. Ужо чацвёрты раз адправілі на 10 содняў у ШІЗА…», – напісаў Зміцер Антончык у Facebook.
Колькі часу Кастусёў правёў у ШІЗА – невядома. У ліпені паведамлялася, што палітвязня пазбавілі спатканняў, забралі асабістыя запісы, у тым ліку чарнавік кнігі і адрасы для ліставання.
Кастусёў мае сур’ёзныя праблемы са здароўем – у яго выявілі анкалагічную хваробу.
Летась у пачатку верасня Менскі абласны суд прыгаварыў Рыгора Кастусёва на 10 гадоў пазбаўлення волі «за спробу дзяржаўнага перавароту з мэтай зрынання ўлады неканстытуцыйным шляхам». Таксама паводле «справы аб змове» асудзілі юрыста Юрася Зянковіча (11 гадоў калоніі), літаратуразнаўцу і палітолага Аляксандра Фядуту (10 гадоў калоніі), працаўніцу офісу Зянковіча Вольгу Галубовіч (2,5 года калоніі) і актывіста Дзяніса Краўчука (2,5 года калоніі). Кастусёў адзіны з іх не прызнаў віны. Папярэдняе расследаванне і судовае следства ў справе аб спробе «дзяржаўнага перавароту» доўжылася 500 дзён.
У снежні мінулага года Рыгора Кастусёва этапавалі ў ПК № 22, дзе ён застаецца і цяпер.
Алена Рувіна belsat.eu
