Сваякі палітвязня журналіста Дзяніса Івашына не маюць звестак пра яго і лічаць, што ён ізноў змешчаны ў штрафны ізалятар. Аб гэтым паведамляе «Гарадзенская праваабарона».
16 траўня стала вядома пра адсутнасць звестак ад палітвязня, гарадзенскага журналіста Дзяніса Івашына. Ягоныя сваякі занепакоеныя тым, што 15 траўня не адбылося тэлефанаванне жонцы, запланаванае паводле графіку званкоў 11-га атраду калоніі ПК № 15 у Магілёве, дзе Івашын адбывае пакаранне.
Пропуск тэлефанавання можа быць абумоўлены рознымі прычынамі. Але родныя Івашына лічаць, што яго чарговы раз змясцілі ў ШІЗА. Ані прычыны для такога пакарання, ані часу, калі гэта сталася, сваякі не ведаюць. Аднак, паводле іхных звестак, Дзяніс быў у атрадзе яшчэ 11 траўня, калі тэлефанаваў сваёй жонцы Вользе Івашынай. А ўжо з 15 траўня ён, відаць, у штрафным ізалятары.
Папярэднія лісты ад журналіста, якія атрымалі ягоныя сваякі, датаваныя 30 красавіка (айчыму), 3 і 8 траўня (маці і жонцы адпаведна). На цяперашні момант дакладных звестак пра Івашына няма.
Як раней паведамляў «Белсат», у верасні мінулага года журналіста Дзяніса Івашына прыгаварылі да 13 гадоў і 1 месяца калоніі ўзмоцненага рэжыму і штрафу памерам 150 базавых адзінак. Кожнаму з дзевяці «пацярпелых» Івашын павінен выплаціць 2000 рублёў. Суд над журналістам пачаўся 15 жніўня і праходзіў у закрытым рэжыме. Вядома, што ў першы дзень перад пачаткам суда Дзяніс Івашын выкрыкнуў у калідоры «Жыве Беларусь! Слава Украіне!».
Журналісту выставілі абвінавачванне паводле арт. 365 («Умяшанне ў дзейнасць супрацоўніка органаў унутраных справаў») і ч. 1 арт. 356 Крымінальнага кодэксу («Здрада дзяржаве»). КДБ абвінаваціў Дзяніса ў супрацы з украінскаю выведкаю. Сваякі і калегі мяркуюць, што затрыманне звязанае з ягоным апошнім расследаваннем пра былых байцоў украінскага «Беркута», якія пасля ўцёкаў з Украіны ўладкаваліся на працу ў беларускі АМАП.
Дзяніс Івашын правёў у СІЗА гарадзенскай турмы 18 месяцаў. За гэты час ён перажыў сэрцавы прыступ, перахварэў на невядомую інфекцыю. На вязня ціснулі: яму блакавалі ліставанне з роднымі, яго неаднаразова кідалі ў карцар. У траўні 2021 года ў Івашына памерла бабуля, аднак яго не пусцілі на пахаванне.
Мірона Маліна belsat.eu
