Ад ліфтавага электрамеханіка да памочніка кіраўніка. БелАЭС шукае амаль 150 працаўнікоў
На сайце Дзяржаўнай службы занятасці з’явіліся 144 вакансіі ад Беларускай атамнай электрастанцыі. Паглядзелі, каго шукаюць і колькі гатовыя плаціць.
Самы нізкі заробак на АЭС прапаноўваюць электрамеханіку для ліфтаў – 704,7–1127,52 рублі. Адукацыя на гэтую пасаду патрэбная сярэдняя спецыяльная.
Крыху больш будзе зарабляць кладаўшчык на першай беларускай атамнай станцыі – ад 805,41 да 1087,3 рублёў. Адукацыя таксама павінна быць сярэдняя спецыяльная.
Адразу пасля 11 класаў школы, з агульнай сярэдняй адукацыяй можна ісці працаваць дэзактыватарнікам на БелАЭС. Плаціць будуць ад 783,68 да 1412,66 рублёў.
Самы высокі заробак прапаноўваюць начальніку змены цэху АЭС – ад 4678,56 да 7017,84 рублёў. Адукацыя патрабуецца вышэйшая, а таксама досвед працы ад 15 гадоў. Абяцаюць даць кватэру.
На БелАЭС шукаюць намесніка генеральнага дырэктара ў галіне якасці. Патрэбная вышэйшая адукацыя і досвед працы ад 15 гадоў. Абяцаюць заробак 3622,32–5433,48 рублёў. Пра службовую кватэру ў вакансіі згадак няма.
Генеральнаму дырэктару АЭС патрэбны таксама памочнік для ўзаемадзеяння з Белэнерга, Мінэнерга і іншымі дзяржаўнымі органамі. Такому працаўніку будуць плаціць 2300,4–3565,68 рублёў. За гэта ад яго патрабуюць вышэйшую адукацыю і ад 15 гадоў досведу.
Намесніка шукае і начальнік аддзелу ядравай бяспекі. Патрабуецца вышэйшая адукацыя і больш за 10 гадоў досведу працы. Заробак 2241,68–3586,69 рублёў.
У спісе шмат вакансіяў інжынераў, у тым ліку – вядучых інжынераў. Шукаюць інжынераў-праграмістаў. Плаціць абяцаюць ад 1200 да 1890 рублёў.
Марыя Міхалевіч belsat.eu
