Прадстаўніцтва ЕЗ пры ААН у Жэневе абнародавала заяву з заклікам да Міжнароднай арганізацыі працы ўжыць супраць Беларусі артыкул 33 Статуту МАП. Гэта пагражае сур’ёзнымі санкцыямі за рэпрэсіі супраць прафсаюзных актывістаў.
У заяве Еўразвязу канстатуецца, што ўлады Беларусі амаль 19 гадоў ігнаруюць рэкамендацыі Міжнароднай арганізацыі працы.
«Мы па-ранейшаму глыбока занепакоеныя рэзкім пагаршэннем правоў чалавека, у тым ліку працоўных, у Беларусі пасля прэзідэнцкіх выбараў 2020 года, якія не былі ані свабоднымі, ані справядлівымі. Гэтыя асцярогі яшчэ больш абвастрыліся пасля суўдзелу Беларусі ў вайне Расеі супраць Украіны», – гаворыцца ў звароце.
Адзначаецца, што ў Беларусі амаль не засталося магчымасцяў для бяспечнага існавання незалежнага прафсаюзнага руху, а Федэрацыю прафсаюзаў Беларусі з увагі на яе цесныя сувязі з уладамі нельга лічыць прадстаўніком працоўных.
Таксама згадваюцца прафсаюзныя актывісты, якія цяпер за кратамі.
«Мы занепакоеныя тэрмінамі зняволення, якія беларускія суды прызначаюць прафсаюзным лідарам і актывістам за ўдзел у мірных сходах або за рэалізацыю іх грамадзянскіх свабодаў у адпаведнасці з законнай прафсаюзнай дзейнасцю. Мы заклікаем да іхнага неадкладнага вызвалення і зняцця ўсіх абвінавачванняў», – гаворыцца ў заяве.
У ЕЗ мяркуюць, што пагаршэнне сітуацыі ў Беларусі патрабуе ўхвалення дадатковых захадаў супраць уладаў.
«Надышоў час актывізаваць дзеянні. Мы цалкам падтрымліваем ухваленне праекту рэзалюцыі аб дадатковых захадах у адпаведнасці з артыкулам 33 Статуту МАП», – падсумоўваецца ў заяве Еўразвязу.
Офіс абранай прэзідэнткі Святланы Ціханоўскай паведаміў «Белсату», што сёння чакаецца зацвярджэнне тэксту рэзалюцыі і вынясенне дакументу на агульнае галасаванне Канферэнцыі Міжнароднай арганізацыі працы. «Рэжым спрабуе змякчыць фармулёўкі, каб яны былі рэкамендацыйнымі, а не абавязковымі», – адзначылі ў Офісе.
Тым часам Святлана Ціханоўская абмеркавала гэтае пытанне з міністрам працы і эканомікі Аўстрыі Марцінам Кохэрам падчас візіту ў Вену.
«Гаварылі пра падтрыманне беларускіх бізнесаў за мяжою, а таксама падтрыманне Аўстрыяй ужывання 33-га параграфу ў дачыненні да рэжыму Лукашэнкі на міжнароднай канферэнцыі працы», – паведаміў Офіс абранай прэзідэнткі.
Акрамя таго, Ціханоўская мела размову з вярхоўным камісарам ААН у правах чалавека Фолькерам Туркам пра сітуацыю з палітвязнямі, пра дзве справаздачы аб Беларусі, што будуць разглядацца на найбліжэйшым паседжанні Рады правоў чалавека ААН, ды пра большы ўдзел ААН у справе вызвалення палітвязняў.
Сяргей Крот belsat.eu