Аляксандр Лукашэнка 2 лютага падпісаў указ № 42, якім скарэктаваў указ ад 22 верасня 2017 года № 345 «Аб развіцці гандлю, грамадскага харчавання і бытавога абслугоўвання».
«Указ накіраваны на развіццё інфраструктуры гандлю, грамадскага харчавання і бытавога абслугоўвання ў сельскай мясцовасці, а таксама стварэнне камфортных умоў для пражывання», – заявілі ў прэс-службе Лукашэнкі.
Згодна з указам, для індывідуальных прадпрымальнікаў і суб’ектаў гаспадарання, якія ажыццяўляюць у сельскай мясцовасці рознічны гандаль, грамадскае харчаванне і аказваюць бытавыя паслугі, з 1 студзеня 2024 года па 31 снежня 2028 года аднаўляецца дзеянне асобных ільгот, якія дзейнічалі ў 2018 – 2022 гадах.
У прыватнасці, вырашана зменшыць на 50 % стаўкі падатку на прыбытак ад рэалізацыі тавараў (работ, паслуг), атрыманы ад дзейнасці на гэтай тэрыторыі, падаходнага падатку з фізічных асоб, калі ІП зʼяўляюцца платнікамі гэтага падатку. Юрыдычныя асобы таксама вызваляюцца ад падатку на нерухомую маёмасць, зямельнага падатку і арэнднай платы за зямельныя ўчасткі, якія знаходзяцца ў дзяржаўнай уласнасці. Таксама ўводзіцца асобны тарыф на электрычную энергію для гандлёвых абʼектаў і абʼектаў грамадскага харчавання на сяле.
Апроч таго, дазволена без атрымання згоды антыманапольнага органа набываць нерухомую маёмасць у сельскай мясцовасці для рознічнага гандлю, грамадскага харчавання, аказання бытавых паслуг. Можна будзе адчужаць без правядзення гандляванняў па рынкавым кошце нерухомую маёмасць, якая знаходзіцца ў дзяржаўнай уласнасці, для такой дзейнасці на працягу не менш як трох гадоў на сяле і ў малых гарадах.
Але льготы дзейнічаюць не паўсюль, а толькі ў тых населеных пунктах, якія вызначаць абласныя саветы дэпутатаў.
За 2023 год колькасць індывідуальных прадпрымальнікаў у Беларусі скарацілася на 10 215. А вось колькасць юрыдычных асобаў вырасла значна менш – толькі на 4,09 тысячы.
Якуб Хруст belsat.eu