У нядзелю да магілы апазіцыйнага расейскага палітыка Аляксея Навальнага, пахаванага 1 сакавіка на Барысаўскіх могілках у Маскве, працягвалі ісці людзі.
Паводле выдання Astra, ушанаваць памяць Навальнага 3 сакавіка прыйшлі сотні чалавек. Чарга з людзей, якія хацелі ўскласці кветкі на магілу палітыка, расцягнулася прыкладна на 600 метраў.
Паводле чытачоў «Медузы», у пэўны момант чарга расцягнулася на 700 метраў. Прыходзілі людзі рознага ўзросту. Побач з уваходам на могілкі стаіць адзін аўтазак, але паліцыя не ўмешвалася.
Выданне «Агентство» сцвярджае, што каб патрапіць на могілкі людзям прыходзілася чакаць ад 15 да 30 хвілінаў.
У 17:00 уваход на Барысаўскія могілкі зачынілі. Людзі скандавалі «Пусціце» і «Адчыніце», а потым пачалі перакідваць кветкі праз агароджу або пакідаць іх на плоце.
Нагадаем, пра тое, што Аляксей Навальны памёр у папраўчай калоніі № 3 у Ямала-Ненецкай аўтаномнай акрузе, 16 лютага паведаміла мясцовае ўпраўленне федэральнай службы выканання пакарання (ФСВП). Яму нібыта стала кепска пасля прагулкі. Чаму памёр Навальны, дакладна не вядома. У адмысловай даведцы пазначана: «Прычыны смерці – натуральныя». Цела доўга не аддавалі сям’і.
Міжнародныя і беларускія дэмакратычныя лідары ўсклалі адказнасць за смерць палітыка на расейскія ўлады.
Навальнага пахавалі 1 сакавіка на Барысаўскіх могілках у Маскве. На развітанне з палітыкам прыйшлі тысячы людзей. Кветкі да магілы апазіцыянера працягвалі несці і на наступны дзень.
Глеб Нержын belsat.eu