«Белавія» аднаўляе працу сваіх сэрвісаў пасля пераходу на расейскую сістэму рэзервацыі
З 2 верасня «Белавія» пачала аднаўляць працу сваіх сэрвісаў пасля пераходу на расейскую сістэму рэзервацыі авіяквіткоў «Леонардо». Аднаўленне будзе ісці паэтапна, паведамляе прэс-служба нацыянальнай авіякампаніі.
Для пасажыраў цяпер даступныя наступныя паслугі:
- пакупка авіяквітка на прамыя і стыковачныя рэйсы «Белавіі». Аформіць квіткі можна ў офісах па продажы, у прадстаўніцтвах і ў агентаў;
- змяненне даты вылету. Таксама магчыма ў офісах па продажы, у прадстаўніцтвах і ў агентаў;
- зварот авіяквітка. Магчымы па месцы набыцця квітка. Калі квіток быў набыты раней на сайце belavia.by, для вяртання трэба звяртацца ў офісы продажу «Белавіі»;
- набыццё такіх дадатковых паслуг, як правоз дадатковага багажу, асаблівых катэгорыяў багажу, перавозка дзяцей і жывёлаў без суправаджэння. Аформіць гэтыя паслугі можна пакуль толькі офлайн у офісах па продажы квіткоў «Белавія», прадстаўніцтвах і ў агентаў.
Дагэтуль недасяжныя:
- пакупка квіткоў на сайце;
- онлайн-рэгістрацыя;
- пакупка месцаў у салоне самалёту;
- афармленне любых паслуг праз плацежную сістэму «Расчёт»;
- мабільнае прыкладанне;
- сэрвісы праграмы «Белавія Лідар»: асабісты кабінет, афармленне прэміяльных квіткоў, выбар месца ў салоне для ўдзельнікаў элітных узроўняў.
«Белавія» абяцае, што онлайн-рэгістрацыя, але без магчымасці выбару месца, будзе дасяжная 3 верасня.
31 жніўня «Белавія» паведаміла, што з 20:00 1 верасня набыць квіткі на рэйсы на сайце, у мабільным дадатку, а таксама ў офісах продажаў кампаніі ды агентаў будзе немагчыма. Гэта звязана з тэхнічнымі працамі для пераходу беларускага авіяперавозніка на расейскую сістэму рэзервацыі квіткоў.
З красавіка да жніўня на сістэму «Leonardo» перайшлі больш за 60 расейскіх авіякампаніяў, венесуэльская «Conviasa», і вось цяпер пераходзіць «Белавія».
Таксама з’явілася інфармацыя, што «Белавію» прымусова адлучаюць ад заходніх сэрвісаў рэзервацыі квіткоў. «Беларускую авіякампанію прымусова адключаюць ад заходніх сэрвісаў, як гэта было ў свой час з расейскімі перавознікамі», – прыводзіла словы сваёй крыніцы «РИА Новости».
9 жніўня Міністэрства фінансаў ЗША ўключыла ў санкцыйны спіс 5 беларускіх кампаніяў, сярод якіх – авіякампанія «Белавія».
Марыя Міхалевіч belsat.eu
