Беларус у Варшаве задумаў праект самаабароны для жанчын, каб мінімізаваць «гамон»
Беларускі прадпрымальнік Мікіта Шацёр, які раней быў дырэктарам бару «Svabody.4» у Менску, а цяпер жыве ў Варшаве, ініцыяваў стварэнне праекту для абароны жанчын ад гвалту. Гэта стала адказам на смерць беларускі Лізы, якая стала ахвярай згвалтавання.
«Ніводная дзяўчына не можа быць на 100 працэнтаў гатовая даць жорсткі адпор пры нападзе неадэкватнага ілба, бо гэта гамон, але кожная дзяўчына можа інвеставаць у сваю бяспеку: трэнаваць рэфлексы і рэакцыі на рэдфлагі і іншыя маркеры, якія сігналізуюць аб небяспецы; практыкаваць асновы самаабароны», – заявіў прадпрымальнік у Instagram.
Цяпер ён шукае людзей, «якія маюць моцную матывацыю дапамагчы з рэалізацыяй».
«Мы створым некамерцыйны праект, задачай якога будзе зрабіць жыццё дзяўчыны больш бяспечным і мінімізаваць гамон у выпадку нападу», – падкрэсліў Мікіта Шацёр.
Нагадаем, што 1 сакавіка стала вядома пра смерць 25-гадовай беларускі Лізаветы, якую згвалтавалі ў цэнтры Варшавы. Напад на яе адбыўся 25 лютага, калі яна вярталася ўначы дадому пешшу. Злачынца кінуўся на яе з нажом, прыціснуў да брамы, душыў і згвалціў. Лізавета ў непрытомным стане доўгі час ляжала на сходах. Яе знайшоў ахоўнік, які прыйшоў на працу ў ранішнюю змену. Ратавальнікі, якія прыбылі на месца здарэння, спрабавалі яе рэанімаваць, потым даставілі ў клінічны шпіталь.
Дзяўчына ўвесь час заставалася пад апаратам штучнай вентыляцыі лёгкіх. Паводле неафіцыйнай інфармацыі, у выніку таго, што нападнік яе душыў, у дзяўчыны спынялася сэрца, у мозг пэўны час не паступаў кісларод, што выклікала незваротныя наступствы.
Якуб Хруст belsat.eu
