Раптоўны мяцеж кіраўніка ПВК Вагнэр Яўгенія Прыгожына, як з тэрыторыі Украіны вырушыў на расейскія гарады і ўжо, як заяўляе, захапіў Растоў-на-Доне і Варонеж, быў даволі нечаканым і за межамі Расеі. Як свет рэагуе на апошнія падзеі ў РФ?
Яшчэ 23 чэрвеня на прыгожынскі мяцеж адрэагавала Міністэрства абароны Украіны. Праўда, сціплай фразай у Twitter: «Мы назіраем».
«Мы таксама», – напісала ў адказ абраная прэзідэнтка Беларусі Святлана Ціханоўская.
У ЗША аб сітуацыі праінфармавалі прэзідэнта Джо Байдэна. Белы дом заявіў, што сочыць за сітуацыяй і будзе кансультавацца з саюзнікамі наконт падзей у Расеі, сказаў прэс-сакратар Рады нацыянальнай бяспекі ЗША Адам Ходж.
CNN са спасылкай на крыніцы паведамляе, што афіцыйныя асобы ЗША лічаць, што цяперашнія заявы Прыгожына – гэта не проста яго традыцыйная рыторыка, а «нешта большае».
«Гэта рэальна», – сказаў адзін амерыканскі чыноўнік. Але дакладнага ўяўлення аб тым, што адбываецца ў Расеі, у Белага дому няма.
Цалкам рэальным назваў канфлікт у Расеі і кіраўнік вайсковай выведкі Украіны Кірыл Буданаў.
«Я б сказаў так, чаму гэта рэжа вока, на мой погляд? Прыгожын, у прынцыпе, падабаецца, не падабаецца, гэта не мае значэння, ён кажа з большага праўду. Мінабароны РФ з большага кажа няпраўду», – сказаў ён.
Паводле яго, гэты канфлікт – гэта бой паміж праўдай і няпраўдай, хоць і той і іншы бок працуюць на Расею.
Прэзідэнт Польшчы Анджэй Дуда паведаміў, што ў сувязі з сітуацыяй у Расеі правёў кансультацыі з прэм’ер-міністрам і Міністэрствам нацыянальнай абароны, а таксама з саюзнікамі.
«Хада падзеяў за нашай усходняй мяжой пад пастаянным маніторынгам», – напісаў ён у Twitter.
У сваю чаргу брытанская выведка мяркуе, што Прыгожын «амаль напэўна» збіраецца дайсці да Масквы. Паводле брытанскіх вайскоўцаў, ПВК Вагнэра вылучылася з Украіны і перасекла мяжу з Расеяй як мінімум у двух месцах. А расейскія вайскоўцы і сілавікі практычна не аказваюць супраціву ПВК.
«У бліжэйшыя гадзіны лаяльнасць расейскіх сіл бяспекі будзе мець ключавое значэнне ў развіцці крызісу. Гэта самы сурʼёзны выклік расейскай дзяржаве за апошні час», – заключылі ў Мінабароны Вялікай Брытаніі.
Якуб Хруст belsat.eu