У работнікаў інфармацыйнай кампаніі БелаПАН сёння раніцаю адбываюцца ператрусы, паведамляюць Naviny.by.
Аб правядзенні ператрусу паспелі паведаміць журналістка Ірына Турчынава, рэдактар інтэрнэт-газеты БелаПАНу Naviny.by Аляксандр Зайцаў і бухгалтарка кампаніі Кацярына Боева.
Не выходзяць на сувязь дырэктарка і галоўная рэдактарка БелаПАНу Ірына Леўшына і журналіст Захар Шчарбакоў. У іх таксама адбываюцца ператрусы.
10:30. Журналіста БелаПАНу Захара Шчарбакова забралі на допыт пасля ператрусу. Пра гэта паведаміла ягоная жонка ў сацыяльных сетках. Якая справа і хто рабіў гэтую захаду, пакуль невядома.
11:00. У намесніка галоўнага рэдактара БелаПАНу Аляксандра Зайцава падчас ператрусу вынялі тэхніку, ён не затрыманы. Працэсуальны статус журналісту не растлумачылі. Паводле Зайцава, ператрус трываў прыблізна гадзіну ў межах справы аб арганізацыі дзеянняў, што груба парушаюць грамадскі парадак (арт. 342 КК). Усяго было сямёра супрацоўнікаў сілавых структураў. Забралі мабільны тэлефон, жорсткі дыск кампʼютара, стары таблет, а таксама рэдакцыйнае пасведчанне і некалькі візітовак. Справу вядзе Следчы камітэт.
11:30. Ператрус удома ў галоўнай рэдактаркі БелаПАНу Ірыны Леўшынай скончыўся. Яе даставілі ў рэдакцыйны офіс, дзе таксама адбудзецца ператрус. Затым Леўшыну павязуць на допыт ва ўпраўленне Следчага камітэту па Менску.
12:20. Журналістку БелаПАНу Ірыну Турчыну адпусцілі пасля допыту. Паведамляюць, што ў яе забралі тэлефон.
13:30. Бухгалтарка БелаПАНу Кацярына Боева цяпер у ІЧУ на Акрэсціна. Яна праходзіць падазраванай паводле ч. 1. арт.342 КК («Арганізацыя і рыхтаванне дзеянняў, што груба парушаюць грамадскі парадак, альбо актыўны ўдзел у іх»), паведаміў ейны муж.
13:35. Родныя паведамляюць, што былы дырэктар БелаПАНу Дзмітрый Наважылаў пасля допыту таксама змешчаны ў ІЧУ.
14:30. Журналіст БелаПАН Захар Шчарбакоў адпушчаны пасля допыту. Пра гэта паведаміла ягоная жонка.
16:13. Дырэктарка і галоўная рэдактарка БелаПАН Ірына Леўшына затрыманая на 72 гадзіны. Яе павязуць на Акрэсціна. Пра гэта паведаміла яе дачка.
У студзені 2021 года ў кампаніі БелаПАН ужо праходзілі ператрусы. Тады іх чынілі працаўнікі УБЭП ГУУС Менскага гарвыканкаму паводле справы медыяменеджара Андрэя Аляксандрава.
МГМ, belsat.eu