Зюзя замест Санты: чыноўнікі расказалі, якія персанажы павінны быць на навагодніх імпрэзах
Арганізатарам святочных імпрэзаў «трэба аддаваць перавагу персанажам з беларускай міфалогіі».
Днямі ў Гарадзенскім выканкаме прайшла сустрэча мясцовых чыноўнікаў з кіраўнікамі гарадскіх арганізацыяў адпачынку і забаваў, паведамляе «Гродно Плюс».
Чыноўнікі рэкамендуюць у навагодніх імпрэзах «папулярызаваць беларускую культуру праз песні і музыку», а таксама праз адпаведных герояў – Зюзю, Цмока, Хатніка.
У Беларусі трывае зацятая барацьба з «чужымі заходнімі каштоўнасцямі». Выліваецца гэта ў барацьбу са святамі, дзіцячымі цацкамі і навагоднімі персанажамі. Напрыклад, пад раздачу трапілі цацка монстра Гагі-Ўагі (Huggy Wuggy), святкаванні Гэлаўіну і Дня святога Валянціна. У мінулыя навагоднія святы ў аграсядзібе ў Чэрвеньскім раёне Менскай вобласці наагул было забаронена праводзіць імпрэзы з удзелам Санта-Клауса і эльфаў.
СП, belsat.eu
