Суд Віцебскага раёну 8 ліпеня разгледзеў крымінальную справу Аляксея Вячэрняга, якога вінавацілі ў абразе прэзідэнта (ч. 1 арт 368 Крымінальнага кодэксу). Пра гэта паведамляе ПЦ «Вясна».
Аляксей Вячэрні – грамадзянін Беларусі ўкраінскага паходжання, ён нарадзіўся ў Чаркаскай вобласці. Удзельнічаў у рэспубліканскіх фестывалях народнай творчасці ў Беларусі. Выхоўвае 16-гадовага сына.
Пасля пачатку абстрэлу Украіны з тэрыторыі Беларусі на эмацыйнай хвалі напісаў верш, запісаў яго на відэа і выклаў у «TikTok». Старонка была прагледжаная не меней за 244 разы. Следства палічыла, што ў гэтым вершы мужчына «дапусціў у непрыстойнай і зняважлівай форме публічную абразу прэзідэнта».
Абвінавачанне запатрабавала для Вячэрняга пазбаўлення волі ў калоніі агульнага рэжыму тэрмінам на два гады.
Суддзя А. Ігнаценка пастанавіў зменшыць прапанаваны пракурорам тэрмін на тры месяцы і пакараў Аляксея Вячэрняга годам і дзевяццю месяцамі пазбаўлення волі ў калоніі агульнага рэжыму.
У Беларусі станам на 11 ліпеня ў зняволенні застаюцца 1236 палітычных вязняў.
Глеб Нержын belsat.eu