Расея ў ноч на 1 кастрычніка нанесла чарговы масавы ўдар па Украіне. Як паведамілі ў Генштабе ЗСУ, сярод іншага былі ўжытыя каля 40 іранскіх ударных БПЛА тыпу «Shahed-136/131».
Як адзначаецца, украінскія сілы і сродкі супрацьпаветранай абароны знішчылі 30 варожых дронаў у межах Адэскай, Мікалаеўскай і Вінніцкай вобласцяў. Авіяцыйныя ўдары таксама зазналі Чарнігаўская, Луганская, Данецкая, Запарожская, Херсонская вобласці.
Агулам Расея нанесла 8 ракетных і 99 авіяцыйных удараў, здзейсніла 45 абстрэлаў з рэактыўных сістэм залпавага агню як па пазіцыях украінскіх войскаў, так і па грамадзянскіх аб’ектах.
У Генштабе адзначылі, што ў выніку расейскіх атак беспілотнікамі ёсць загінулыя і параненыя сярод цывільнага насельніцтва. Разбурэнні і пашкоджанні атрымалі прыватныя жылыя дамы і іншая грамадзянская інфраструктура.
Спікер украінскага добраахвотніцкага войска «Поўдзень» Сяргей Братчук у эфіры «Адзіных навінаў» распавёў, што атакі дронамі былі з трох напрамкаў: мысу Чауда, Прыморску-Ахтарску і Курску. Пры гэтым беспілотнікі спрабавалі паразіць сістэмы супрацьпаветранай абароны і партовую інфраструктуру. Пры гэтым яны намагаліся блытаць маршруты і максімальна загружаць сістэму СПА.
Прэс-афіцэр Сілаў абароны «Поўдня» Наталля Гумянюк паведаміла, што на Мікалаеўшчыне адбылося траплянне ў складскія памяшканні. Там працягваецца разбор завалаў і тушэнне пажару.
Прадстаўнік Херсонскай адміністрацыі Аляксандр Талаконнікаў распавёў, што ў Станіслававе пад абстрэламі пацярпелі чатыры чалавекі. Яшчэ адзін чалавек знаходзіцца пад заваламі. У Херсоне ў выніку абстрэлаў знікла святло. Паводле Талаконнікава, у Херсонскай вобласці вялікія разбурэнні праз тое, што вельмі павялічылася колькасць авіяўдараў.
У Чаркаскай вобласці, ва Умані, у выніку абстрэлаў узніклі пажары на складскіх памяшканнях, дзе захоўвалася збожжа. Паводле папярэдняй інфармацыі, пацярпеў адзін чалавек, ён дастаўлены ў больніцу.
Румынія перамяшчае супрацьпаветраную абарону бліжэй да мяжы з Украінай, дзе расейскія беспілотнікі атакуюць збожжавыя абʼекты, і дадае ў гэты раён больш вайсковых назіральных пунктаў і патрулёў. Раней стала вядома, што ў краіне размяшчаюць чатыры дадатковыя амерыканскія знішчальнікі F-16 і каля 100 амерыканскіх вайскоўцаў, а таксама пашыраюць беспалётную зону.
Усё гэта зʼяўляецца прыкметай росту занепакоенасці Румыніі і NATO у тым, што вайна на Украіне можа перакінуцца на яе тэрыторыю. Раней на румынскую тэрыторыю ўжо неаднаразова падалі рэшткі расейскіх дронаў.
Якуб Хруст belsat.eu