Ініцыятарка марафону салідарнасці Вольга Гарбунова запэўніла, што размеркаванне і выдаткоўванне сабраных грошай будзе празрыстым, а фонды падрыхтуюць адмысловыя справаздачы. Яна падзякавала за данаты, назваўшы вынік неймаверным. Заяву Гарбуновай распаўсюдзіў Аб’яднаны пераходны кабінет.
Ініцыятарка марафону салідарнасці з палітвязнямі, прадстаўніца ў сацыяльнай палітыцы Аб’яднанага пераходнага кабінету Вольга Гарбунова прызналася, што «назірала за зборам, затаіўшы дыханне»:
«Я, гэтак жа, як і вы, затаіўшы дыханне, назірала за зборам і, як мінімум, двойчы здзіўлялася: калі мы перасягнулі першапачатковую мэту 200 000 яшчэ ў суботу і калі мы ўбачылі лічбу 500 000 за некалькі гадзінаў да заканчэння. Вы натхняеце!»
Гарбунова падкрэсліла, што ані арганізатары марафону, ані фонды, якім пералічаць грошы, не забяруць сабе ні капейкі – усё выдаткуюць палітвязням.
«Усе сабраныя сродкі будуць перанакіраваныя ў 13 праваабарончых ініцыятываў і фондаў салідарнасці. Грошы будуць размеркаваныя паміж імі ў пэўных прапорцыях, адпаведна запытам на падтрыманне, якія ў іх ёсць зараз», – распавяла прадстаўніца Кабінету.
Празрыстасць размеркавання грошай пракантралюе адмысловая Назіральная рада. У ейным складзе – Гарбунова, а таксама прадстаўнікі беларускіх медыяў: «Белсату», «Еўрарадыё», «Зеркала» ды «Маланкі».
«Цягам тыдня Назіральная рада ўхваліць рашэнне аб размеркаванні сродкаў, фонд падпіша дамовы з арганізацыямі і ажыццявіць пераводы. Праз 2 месяцы арганізацыі зробяць справаздачу – і Назіральная рада публічна раскажа аб выніках», – падсумавала Вольга Гарбунова.
Падчас марафону салідарнасці «Нам не ўсё адно!» беларусы сабралі 574 356 еўраў. Акцыю зладзілі больш за 20 незалежных медыяў, у тым ліку «Белсат». Гасцямі супольнага эфіру сталі беларускія палітыкі і актывісты, спартоўцы, музыкі і творцы.
Галоўная мэта марафону – падтрымаць палітзняволеных і іхныя сем’і ды сабраць грошы для іх.
Цяпер у Беларусі, паводле праваабарончага цэнтру «Вясна», 1474 палітзняволеныя.
Сяргей Крот belsat.eu