Святлана Ціханоўская правяла сустрэчу з прэзідэнтам Латвіі Эдгарсам Рынкевічсам, на якой абмеркавалі пытанні еўрапейскага выбару беларусаў, падтрыманне пашпартоў новай Беларусі, а таксама прыцягненне рэжыму Лукашэнкі да адказнасці.
Падчас сустрэчы Святлана Ціханоўская паведаміла Эдгарсу Рынкевічсу пра масавыя ператрусы, якія праводзілі беларускія спецслужбы ў жытле прадстаўнікоў дэмакратычных структураў: Офісу Святланы Ціханоўскай, Аб’яднанага пераходнага кабінету, Каардынацыйнай рады, НАУ і Народных амбасадаў.
Дэмакратычная лідарка таксама нагадала, што некаторыя беларускія палітвязні не маюць сувязяў з вонкавым светам больш за паўгода. Пры гэтым на сустрэчы было адзначана, што не можа быць і гаворкі аб змякчэнні ціску на рэжым Лукашэнкі, пакуль унутры Беларусі працягваецца ціск на беларусаў.
Уздымалася на сустрэчы і пытанне прыцягнення беларускага рэжыму да адказнасці за дэпартацыі ўкраінскіх дзяцей і злачынствы супраць чалавецтва: Святлана Ціханоўская заклікала прэзідэнта Латвіі падтрымаць выдачу ордару на арышт Лукашэнкі.
Акрамя таго, беларуская дэмакратычная лідарка звярнулася да Рынкевічса з просьбай знайсці развязанне праблемаў легалізацыі беларусаў у Латвіі і распавяла яму пра праект новага беларускага пашпарта.
Нагадаем, што 28 лістапада Святлана Ціханоўская на сустрэчы з дзяржсакратаром Міністэрства ўнутраных справаў Латвіі Дзімітрыйсам Трафімаўсам заклікала Латвію прызнаваць пратэрмінаваныя пашпарты беларусаў (згодна з указам Аляксандра Лукашэнкі ад 4 верасня 2023 года «Аб парадку выдачы дакументаў і здзяйснення дзеянняў» беларусы не могуць атрымаць новы пашпарт за мяжой).
7 лістапада прадстаўнікі Міністэрства замежных справаў Нямеччыны запэўнілі Ціханоўскую, што будуць прызнаваць беларускія пашпарты, калі тэрмін іх дзеяння скончыўся.
Раман Шавель belsat.eu