Апеляцыйную скаргу на вырак палітвязню Эдуарду Бабарыку Вярхоўны суд пачне разглядаць 27 лістапада. Пра гэта паведамляе праваабарончы цэнтр «Вясна». Вырак Эдуарду Бабарыку агучылі 5 ліпеня ў Менскім абласным судзе: 8 гадоў калоніі ўзмоцненага рэжыму.
Апеляцыю палітвязня Эдуарда Бабарыкі пачне разглядаць судовая калегія, старшыняваць у якой будзе суддзя Ігар Буката. Пасяджэнне ў Вярхоўным судзе мае адбыцца ў панядзелак 27 лістапада. Гэтая дата пазначаная ў раскладзе Вярхоўнага суда.
Нагадаем, што вырак у судзе першай інстанцыі аб пакаранні Бабарыкі на восем гадоў калоніі ўзмоцненага рэжыму прысудзіў у ліпені так званы суддзя Уладзімір Арэшка. Праваабаронцы адзначалі, што ў гэты тэрмін «суддзя» не залічыў паўтара года, адбытыя палітвязнем да суда ў СІЗА КДБ.
Эдуарда Бабарыку вінавацілі паводле трох крымінальных артыкулаў, а менавіта: у «распальванні іншай сацыяльнай варожасці» (ч. 3 арт. 130 КК), у суарганізацыі дзеянняў, што груба парушаюць грамадскі парадак (п. 6 арт. 16 і ч. 1 арт. 342 КК) і ва ўхіленні ад выплаты падаткаў (ч. 2 арт. 243 КК).
22 лістапада Вярхоўны суд у межах разгляду апеляцыйнай скаргі адтэрмінаваў выкананне прысуду (тры гады калоніі) палітзняволенай з Віцебску Таццяне Пыцько, якую павінныя былі ўчора вызваліць з СІЗА № 2. А таксама зменшыў на паўгода прысуджаны тэрмін палітвязню Вячаславу Лазараву, змяніўшы рэжым утрымання на агульны (першапачатковы вырак: пяць з паловай года ўзмоцненага рэжыму). Так прысудзіў учора суддзя Юры Руткоўскі. Ён перакваліфікаваў склад «злачынства».
Зміцер Міраш belsat.eu
