Пра затрыманне ўладальніка менскіх рэстаранаў паведаміў тэлеграм-канал ГУБАЗіКу, на якім апублікаванае пакаяннае відэа з бізнесоўцам, ягонай жонкай і сынам.
Рэстаратар і ягоная сям’я былі затрыманыя нібыта за ўдзел у акцыях пратэсту ў 2020 годзе.
«Наша Ніва» высветліла, што затрыманы мужчына – Сяргей Міргародскі, які валодае двума рэстаранамі ў Менску на вуліцы Рэвалюцыйнай, – «Дом» і «Умамі». На гэтай жа вуліцы размяшчаецца ГУБАЗіК.
Ці заведзеная на Міргародскіх крымінальная справа, не вядома. ГУБАЗіК піша, што праводзіцца праверка «празрыстасці і павелічэння капіталу» бізнесоўца. Пішуць, што большую частку года сямʼя праводзіла за межамі Беларусі.
Сяргею Міргародскаму 57 гадоў. Апроч згаданых рэстаранаў ён трымае сетку кулінарных лавак «Юшка з пеўня» («Уха из петуха») у Менску.
Паводле праваабарончага цэнтру «Вясна», на 22 жніўня ў Беларусі прызнаныя палітычнымі вязнямі 1303 чалавекі.
Зміцер Міраш belsat.eu