МЗС Украіны звярнулася да прэзідэнта Уладзіміра Зяленскага з запытам пра разрыў дыпламатычных стасункаў з Расеяй. У сваю чаргу ў Крамлі кажуць, што Масква не жадае дыпламатычнага разрыву з Украінай.
Украінскі прэзідэнт Уладзімір Зяленскі атрымаў запыт з боку МЗС з прапановай разарваць дыпламатычныя стасункі з Расеяй. Пра гэта прэзідэнт распавёў на брыфінгу.
«Мы бачым з вамі наступ на суверэнітэт і тэрытарыяльную цэласнасць дзяржавы. Да мяне прыйшоў запыт ад Міністэрства замежных справаў, каб я разгледзеў пытанне аб разрыве дыпламатычных адносін паміж Украінай і Расейскай Федэрацыяй. Я цяпер адразу пасля нашай прэс-канферэнцыі буду разглядаць гэтае пытанне і не толькі гэтае пытанне, але і іншыя нашы крокі ў адказ на эскалацыю з боку Расейскай Федэрацыі», – сказаў Уладзімір Зяленскі.
Прэзідэнт Украіны лічыць, што існая сітуацыя з захопам Данбасу – выклік для ўсёй сусветнай супольнасці.
А вось у Расеі не хочуць разрываць дыпламатычных стасункаў з Украінай.
«Натуральна, расейскі бок на ўсіх узроўнях застаецца адкрытым для дыпламатычных кантактаў. Расейскі бок зацікаўлены ў гэтых кантактах», – цытуе ТАСС прэс-сакратара Крамля Дзмітрыя Пяскова.
Паводле яго, разрыў яшчэ больш ускладніць узаемаадносіны.
СЛ belsat.eu
