Улады Беларусі ды Расеі з розніцай у некалькі дзён прынялі пастановы супраць прадстаўнікоў руху «Смаленская рэспубліка». Яго тэлеграм-канал прызнаны «экстрэмісцкімі матэрыяламі», а лідар – «замежным агентам».
15 студзеня суд Кастрычніцкага раёну Віцебску прызнаў «экстрэмісцкімі» матэрыяламі тэлеграм-каналу «Смоленская Республика (Смаленская Рэспубліка)». Адпаведнае рашэнне ўвайшло ў Рэспубліканскі спіс экстрэмісцкіх матэрыялаў, апублікаваны на сайце Міністэрства інфармацыі Беларусі.
А 19 студзеня ўжо Міністэрства юстыцыі Расеі абвясціла «замежным агентам» смаленскага дэпутата Уладзіслава Жывіцу, які з’яўляецца адным з лідарам руху смаленскіх рэспубліканцаў.
13 жніўня 2023 года ў Варшаве адбылося мерапрыемства, падчас якога было абвешчана аб стварэнні палітычнай арганізацыі прыхільнікаў незалежнасці Смаленшчыны і быў прэзентаваны сцяг вольнага Смаленска.
Спікерам на мерапрыемстве быў дзеючы дэпутат Смаленскай абласной думы РФ Уладзіслаў Жывіца, які расказаў аб прычынах, што заахвоцілі яго стварыць у эміграцыі Смаленскі вызваленчы рух, і заклікаў далучыцца да гэтага руху смаленскіх чыноўнікаў і дэпутатаў усіх узроўняў. У сваёй прамове ён адзначыў, што «Расея павінна быць разбурана».
Ідэі аднаўлення самастойнай Смаленскай дзяржаўнасці ў цесным хаўрусе з будучай новай Беларуссю і іншымі краінамі, тэрыторыі якіх раней уваходзілі ў Вялікае Княства Літоўскае і Рэч Паспалітую, з лета 2022 года папулярызуюцца тэлеграм-каналам «Смаленская Рэспубліка».
Якуб Хруст belsat.eu
