У Ізраілі не спыняюцца пратэсты, нягледзячы на прыпыненне судовай рэформы. У суботу, паводле ацэнак арганізатараў, акцыі адбыліся ў 150 лакацыях па ўсёй краіне, на вуліцы выйшлі блізу 400 тысячаў грамадзянаў, піша выданне Times of Israel.
Галоўнае патрабаванне дэманстрантаў – цалкам скасаваць судовую рэформу, а не прыпыніць яе. Арганізатары пратэстаў сцвярджаюць, што ў суботу на акцыі выйшлі каля 400 тысячаў асобаў. Самая буйная маніфестацыя адбылася ў Тэль-Авіве, яна сабрала 150 тысячаў удзельнікаў. Там здарыліся сутыкненні з паліцыяй, былі ўжытыя вадамёты. Сямёра дэманстрантаў затрыманыя.
Пры гэтым у некаторых гарадах зладзілі былі ў падтрымку рэформы, аднак, як піша Times of Israel, масавымі яны не сталіся. Напрыклад, у акцыі ў Нетаніі, дзе з прамоваю выступіў прыхільнік зменаў, міністр бяспекі Ітамар Бэн-Гвір, бралі ўдзел 150 асобаў, а да дэманстрацыі супраць рэформы ў гэтым жа горадзе далучыліся 24 тысячы грамадзянаў.
Напярэдадні новых дэманстрацыяў міжнароднае агенцтва Moody’s пагоршыла эканамічны рэйтынг Ізраілю з «пазітыўнага» на «стабільны». Аналітыкі папярэдзілі, што краіна можа стаць менш прывабнай для інвестараў праз наступствы судовай рэформы.
Змены ў судовай сістэме прасоўвае прэм’ер-міністр Ізраілю Бэньямін Нэтаньягу. Ён хоча надзяліць парламент правам касаваць пастановы Вярхоўнага суда, а таксама ўзмацніць кантроль ураду за выбарамі суддзяў Вярхоўнага суда.
27 сакавіка Нэтаньягу абвесціў пра прыпыненне рэформы.
Сяргей Крот belsat.eu