Навучэнцаў старэйшых класаў у Беларусі будуць вучыць вайсковаму перакладу. Міністэрства адукацыі зацвердзіла праграму адпаведнага факультатыву па прадмеце «англійская мова». Гэта вынікае з пастановы, якая была апублікаваная 16 студзеня на Нацыянальным прававым інтэрнэт-партале.
«Вайсковы пераклад» будзе вывучацца ў 10-11 класах. Праграма складаецца з 69 вучэбных гадзінаў – 35 з іх – у 10 класе і 34 – у 11-м.
«На факультатыве вучні змогуць развіць моўныя навыкі, свае здольнасці, а таксама атрымаць навыкі і ўменні вайсковага перакладу, набыць веды па структуры ўзброеных сілаў ЗША і Вялікай Брытаніі», – гаворыцца ў пастанове Мінадукацыі.
У рамках навучання будуць выкарыстоўвацца наступныя працы і практыкаванні:
- пераклад з аркуша замежнага тэксту ці перадача яго зместу;
- двухбаковы пераклад размовы, допыту, апытання;
- расшыфроўка абрэвіятураў;
- перадача зместу схемаў ваеннага характару;
- пісьмовы пераклад ваенных і ваенна-тэхнічных тэкстаў з англійскай мовы на расейскую.
Па выніках праходжання праграмы факультатыву вучні павінны навучыцца, сярод іншага, вылучаць інфармацыю з тэксту вайсковай тэматыкі, чытаць змест баявых дакументаў і перадаваць іх сутнасць на расейскай мове, ажыццяўляць двухбаковы пераклад размовы ці допыту ваеннапалоннага (апытання мясцовага жыхара), вызначаць паводле знакаў адрознення вайскоўцаў ЗША і Вялікай Брытаніі іхную прыналежнасць да пэўных званняў і катэгорыяў.
У праграме факультатыву для 10 класа наступныя тэмы:
- вайсковы пераклад як дзейнасць;
- Узброеныя сілы Вялікай Брытаніі;
- жыццё вайскоўца;
- мотапяхотны ўзвод;
- вайсковая адукацыя;
- ваеннапалонныя (першасны допыт ваеннапалоннага, правілы вядзення допыту);
- баявыя дакументы;
- ваенна-тапаграфічныя мапы.
У праграме 11 класа:
- структура нацыянальнай бяспекі ЗША;
- віды войскаў і службы арміі ЗША;
- мотапяхота;
- бранятанкавыя войскі ЗША;
- артылерыя ЗША;
- ваенна-паветраныя сілы ЗША;
- ваенна-марскія сілы ЗША;
- Паўночнаатлантычны блок (НАТО).
Марыя Міхалевіч belsat.eu
