Рэпрэсіі рэжыму Аляксандра Лукашэнкі супраць беларускага народу не спыняюцца ні на дзень. Увесь час прыходзяць паведамленні пра новыя затрыманні, суды ці забароны. Сабралі навіны за 16 студзеня.
У Гарадзенскім абласным судзе 16 студзеня пачаўся разгляд справы ў дачыненні вядомага гарадзенскага журналіста і сябра Саюзу палякаў у Беларусі Анджэя Пачобута. Судовы працэс над ім будзе праходзіць у закрытым рэжыме, на гэтым настаяла пракуратура. Журналіста абвінавачваюць у закліках да дзеянняў абмежавальнага характару, скіраваных на прычыненне шкоды нацыянальнай бяспецы Рэспублікі Беларусь (ч. 3 арт. 361 КК), а таксама ў распальванні сацыяльнай варожасці або разладу (ч. 3 арт. 130 КК). Анджэй Пачобут застаецца за кратамі ўжо год і дзесяць месяцаў.
Сяргею Ціханоўскаму прад’яўлена новае абвінавачанне. Па дадзеных следства, палітвязень падчас адбыцця тэрміну «сістэматычна дапушчаў непадпарадкаванне законным патрабаванням адміністрацыі папраўчай установы, правакаваў канфлікты, у тым ліку з сукамернікамі. За гэта неаднаразова падвяргаўся спагнанням». Дзеянні Ціханоўскага кваліфікаваны па ч.2 арт.411 («Злоснае непадпарадкаванне патрабаванням адміністрацыі папраўчай установы») КК.
Марыю Калеснікаву перавялі з медчасткі ў атрад. Яна ўжо выйшла на працу і пакрысе набірае вагу пасля аперацыі. Вядома, што перад шпіталізацыяй яе змясцілі ў ШІЗА на 10 содняў. Некалькі разоў яна губляла прытомнасць, у яе быў павышаны ціск і млоснасць.
У Менску пачалі судзіць палітзняволенага адваката Віталя Брагінца. Яго абвінавачваюць паводле чатырох артыкулаў КК: ч. 3 арт. 130 («Распальванне іншай сацыяльнай варожасці»), ч. 3 арт. 361 КК за заклікі да санкцый, ч.1 арт. 361-1 («Стварэнне экстрэмісцкага фармавання альбо ўдзел у ім») і ч. 1 арт. 342 («Актыўны ўдзел у дзеяннях, якія груба парушаюць грамадскі парадак»). Брагінец абараняў некаторых палітвязняў, у тым ліку старшыню Праваабарончага цэнтру «Вясна» Алеся Бяляцкага, а таксама адваката Андрэя Мачалава, які на судзе застаўся без абароны праз арышт Віталя.
Супрацоўніка «Белтэлекаму»Дзмітрыя Каханоўскага асудзілі на шэсць з паловай гадоў калоніі за завалоданне персанальнымі дадзенымі сілавікоў. Працэс праходзіў у закрытым рэжыме. Палітзняволенага судзілі паводле ч. 3 арт. 352 («Неправамоцнае завалоданне камп’ютарнай інфармацыяй»), ч. 3 арт. 130 («Распальванне іншай сацыяльнай варожасці»), ч. 3 арт. 203-1 («Незаконныя дзеянні ў дачыненні інфармацыі аб прыватным жыцці і персанальных дадзеных») КК.
Даследчыцу беларускіх вязняў ГУЛАГу Валерыю Чарнаморцаву асудзілі на два з паловай гады «хатняй хіміі» за ўдзел у пратэстах 2020 года паводле ч. 1 арт. 342 КК («Арганізацыя і падрыхтоўка дзеянняў, якія груба парушаюць грамадскі парадак, альбо актыўны ўдзел у іх»). Яе выпусцілі ў зале суда.
Чарговага беларуса затрымалі пасля вяртання з Польшчы за распаўсюд экстрэмісцкіх матэрыялаў (арт.19.11 КаАП), абразу Аляксандра Лукашэнкі (арт. 368 КК) і супрацоўнікаў міліцыі (арт. 369 КК). Верагодна, імя затрыманага – Дзмітрый Палішэвіч.
Суд у Гомлі адхіліў скаргу Ларысы Шчыраковай на ўтрыманне пад вартай. Судовае пасяджэнне вёў суддзя Аляксандр Зінчук. Шчыракова па-ранейшаму застаецца ў СІЗА-3. Дэталі справы невядомыя, паколькі суд прайшоў у закрытым рэжыме.
Па даносу «неабыякавай расяянкі» ў Берасці асудзілі Аляксандра Труша паводле ч. 1 арт. 368 КК за абразу Аляксандра Лукашэнкі. Яго асудзілі на паўтара года пазбаўлення волі ў калоніі ва ўмовах агульнага рэжыму. Вядома, што 16 жніўня 2022 года Аляксандр у прысутнасці іншых людзей заявіў, што Лукашэнка здраднік і фашыст. Размова адбылася са знаёмымі на вуліцы каля пад’езду. Да кампаніі падышла жыхарка дома і запатрабавала замаўчаць. Пасля жанчына патэліла ў міліцыю і данясла на Труша, што «у двары кампанія з 8 чалавек, лаяць уладу, называюць Лукашэнку здраднікам ды фашыстам».
Алена Рувіна belsat.eu